Qostanaıda joǵalyp ketken dárigerdiń qaryzy bolýy múmkin - polıtsııa
QOSTANAI. QazAqparat - Qostanaı oblysynda 6 kún boıy 35 jastaǵy dáriger izdestirilip jatyr, dep habarlaıdy «QazAqparat» HAA tilshisi.
Oblystyq ІІD qylmystyq ister basqarmasynyń qyzmetkeri Almat Dosov aıtqandaı, joǵalyp ketken dárigerdiń qaryzy bolýy múmkin.
«Bálkim, dárigerdiń joǵalýyna materıaldyq jaǵdaıy áser etken bolýy kerek. Ol áldekimderden aqsha alyp, uıaly telefonyn sóndirip qoıýy yqtımal. Taǵy bir boljam - otbasylyq jaǵdaı. Úı ishinde urys-kerister oryn alyp, birneshe ýaqytqa jalǵyz qalǵysy kelgen shyǵar», - degen derek aıtady polıtseı.
Tártip saqshysy taǵy bir nusqanyń bolýyn joqqa shyǵarmaıdy. Ol - sýıtsıd.
«Ózine-ózi qol jumsady dep naqty aıta almaımyz. Sebebi, dárigerdi qalalyq ІІB barlyq quramy izdestirip jatyr. Munyń syrtynda eriktiler toby da bar», - dedi Almat Dosov.
Joǵalyp ketken Erbol Kákimovtiń jubaıy Tatıana Mınenkonyń aıtýynsha, ol 15 aqpan kúni ulyn mektepke aparǵan.
Erbol Kákimov Qostanaı onkologııalyq dıspanserinde reanımatolog, anestezıolog bolyp jumys isteıdi. Joǵalyp ketken kúni ústinde qara kýrtka, kók djıns shalbar bolǵan. Sondaı-aq, ózimen shaǵyn qara sómke alyp júredi.
