Qostanaıda joǵalyp ketken stýdent óli kúıinde tabyldy

ASTANA. KAZINFORM — 19 naýryzdan beri iz-túzsiz joǵalǵan 17 jastaǵy Vladımır Orel Qostanaıda Tobyl ózeni mańynan óli kúıinde tabyldy, dep habarlaıdy Kazinform tilshisi.

Aldymen bul aqparatty eriktiler habarlaǵan, keıin ony polıtsııa rastady.

— Kámeletke tolmaǵannyń joǵalý faktisi boıynsha qylmystyq is qozǵaldy. Jedel-izdestirý sharalary barysynda Gagarın bógetine jaqyn qamysty aýmaqtan onyń denesi tabyldy. Zorlyq-zombylyq belgileri anyqtalǵan joq. Qazirgi ýaqytta oqıǵanyń barlyq mán-jaıyn anyqtaýǵa baǵyttalǵan tergeý áreketteri júrgizilýde, — dep málimdedi polıtsııa.

Sondaı-aq tártip saqshylary turǵyndardy tek resmı aqparat kózderine senip, tekserilmegen málimetterdi taratpaýǵa shaqyrdy.

Eske sala keteıik, buǵan deıin Qostanaıda Vladımır Orel esimdi jasóspirim joǵalyp ketkeni habarlanǵan edi. Ony sońǵy ret jataqhanadan shyǵyp bara jatqan kezde kórgen, sodan keıin baılanys úzilgen.

Keıinnen atalǵan derek boıynsha qylmystyq is qozǵalǵan.