Qostanaıda joǵalǵan 5 jasar qyz balany izdeý úshinshi kúnge sozyldy

QOSTANAI. QazAqparat - Úsh táýlik boıy polıtseıler, eriktilermen qosa myńdaǵan qostanaılyqtar Jambyl aýylynyń mańyn aralap, joǵalyp ketken 5 jasar Madına Erlanqyzyn izdeýde, dep habarlaıdy QazAqparat tilshisi.

Tamyzdyń 7-si kúni tańerteń Jambyl aýylynda bes jasar qyzdyń úıinen qashyp ketkeni týraly habar búkil óńirdi dúr silkindirdi. Polıtseıler balanyń anasy departamentke aryz jazyp, júgingenin aıtty.

Bala 18 jáne 13 jastaǵy ápkelerimen birge úıde bolǵan. 5 jasar balanyń úıden qalaı shyqqany baıqalmaǵan. Polıtsııa keltirgen oqıǵalar hronologııasyna sáıkes, qyz tańerteń jetide úıden shyqqan. As úıdiń ekinshi qabatynyń terezesinen shyǵyp, gaz qubyrynyń kómegimen kúnqaǵarǵa túsip, sol jerden aǵashqa sekirgen.

Aýlada shyqqan shýǵa páterdegi kórshisi shyǵyp, balanyń aǵashtan túsýine kómektesken. Qyzdy úıge alyp kelip, esikti qaǵyp turǵanda, qyz oıyn alańyna qaraı qasha jónelgen.

Bir saǵattan keıin bala beınebaqylaý kamerasyna túsken. Messendjerler arqyly taratylǵan vıdeoda bala oıyn alańynan qashyp ketkeni kórinedi.

Madınany Qostanaı-Vedenka baǵytyndaǵy tas joldan kórgender bar. Sol kúni qyzdy tańerteń aýylǵa qaraı kele jatqan traktorshy men velosıpedshi de baıqaǵan.

Bastapqyda Jambyl aýylynda izdeý jumystary júrgizilip, jaqyn mańdaǵy aýmaqtar qaraldy. Sol kúni keshke, 7 tamyzda, múmkindiginshe kóp adam jumyldyryp, izdeý aımaǵy keńeıtildi.

8 tamyzda qyzdy izdeýge 500-den astam polıtsııa qyzmetkeri, óńirdiń barlyq izdestirý-qutqarý jasaqtarynyń eriktileri, jergilikti bılik ókilderi men aýyl turǵyndary qosyldy.

Іzdeý jumystaryna tikushaq, júgeri jınaıtyn kombaın, drondar men tyńshy ıtter de jumyldyrylǵan. Janashyr jandardyń barlyǵy sábıdi tabýǵa kómekteskisi keldi. Jalǵyz júrgenine bir kúnnen asqan Mádınanyń qaı jerde ekeni áli belgisiz.