Qostanaıda joǵalǵan 11 jastaǵy balany 200 adam izdedi
ASTANA. QazAqparat - Qostanaı oblysynyń Kıevskıı kentinde sabaqtan keıin joǵalyp ketken 11 jastaǵy Edýard Shıllerdi izdeý jumystaryna 200 adam jumyldyryldy, dep habarlaıdy «QazAqparat» HAA alau.kz-ke silteme jasap.
Balanyń anasy Lıýdmıla Shıllerdiń aıtýynsha, onyń uly 23 qarasha kúni sabaqtan oralmaǵan. Ol ádette 12:30-da úıine keletin bolǵan. Jumystan shamamen 19:00 kezinde oralatyn anasy keshe kúndegisinen erte kelgen. Úıine kire sala, balasynyń kelmegenin kórip, birden polıtsııaǵa habarlaǵan. Balanyń joǵalǵandyǵy jaıly habarlama áleýmettik jelilerde de taraldy.
«Biz izdeý jumystaryna kómek surap, balany izdeýge birden kiristik. Kıevskıı kentindegi árbir qýysty, aýlalar men alańdardy aralap shyqtyq. Ony shamamen 200 adam izdedi. Ábden tońǵan ol túngi 2.30 kezinde úıge keldi», - dedi Lıýdmıla Shıller. Bala kóshedegi oryndyqta uıyqtap qalǵan. Tún ortasynda ótip bara jatqan Kamazdyń dybysynan oıanǵan.
«Polıtsııa qyzmetkerleri balany, onyń zattaryn tekserdi. Kúdiktenetindeı eshteńe tappady. Edýard qalshyldap tońyp, jótelip tur. Aýrýhanaǵa qaralamyz. Ulymdy izdeýge kómekteskenderdiń barlyǵyna alǵysym sheksiz», - dedi balanyń anasy.
