Qostanaıda jyl basynan beri óndiriste 7 adam qaza tapty
ASTANA. KAZINFORM — Qostanaıda jyl basynan beri eńbek qyzmetine baılanysty 38 jazataıym oqıǵa tirkeldi. Bul ótken jyldyń sáıkes kezeńimen salystyrǵanda 39%-ǵa kóp.
Memlekettik eńbek ınspektsııasy komıteti departamentiniń málimetinshe, bıyl óndiriste 38 jazataıym oqıǵa bolǵan. 2025 jyldyń osy kezeńinde mundaı 23 jaǵdaı tirkelgen.
Oqıǵalardyń jeteýi adam ólimimen aıaqtalǵan. Jazataıym oqıǵalardyń 8-i densaýlyq saqtaý salasynda tirkeldi. Mamandar óndiristegi jaraqattanýdyń negizgi sebepteri retinde jumystyń tıisti deńgeıde uıymdastyrylmaýyn, zardap shekkenderdiń óreskel abaısyzdyǵyn, sondaı-aq eńbek jáne óndiristik tártiptiń buzylýyn atap otyr.
Qaıǵyly jaǵdaılardyń biri 2026 jylǵy 19 naýryzda «ATP» jeke kásipkerligine jalǵa berilgen aýmaqta bolǵan. Júrgizýshi kabınasy kóterilgen MAZ júk kóligin jóndep jatqan. Qozǵaltqyshty iske qosqannan keıin kólik qozǵala bastaǵan. Jumysshy qozǵaltqyshty óshirýge áreket jasaǵan. Alaıda kólik kedergige soǵylǵannan keıin kabınasy jabylyp, jumysshyny qysyp qalǵan. Er adam oqıǵa ornynda qaza tapty.
Komıssııa jumys berýshiniń kásibı táýekelderdi baǵalamaǵanyn jáne jumysty qaýipsiz júrgizý tehnologııasyn qamtamasyz etpegenin anyqtady. Jumys berýshiniń kinási 100% dep belgilendi.
Taǵy bir oqıǵa «RybTorg» jeke kásipkerliginiń balyq tsehynda bolǵan. Qaptama qaǵazyn jınaý kezinde jumysshynyń qolyn jumys istep turǵan jeldetkish tartyp ketken. Er adam bileginen aýyr jaraqat alǵan. Tekserý barysynda jumysshynyń jumys ornynda tıisti nusqamadan ótpeı, jumysqa jiberilgeni anyqtaldy. Bul jaǵdaıda da jumys berýshiniń kinási 100% dep belgilendi.
Vedomstvo ókilderi oblysta qaýipsiz eńbekti qamtamasyz etý jónindegi is-qımyl josparynyń júzege asyrylyp jatqanyn eske saldy. Jospar óndiristik jaraqattanýdyń aldyn alýdy, qyzmetkerlerdi jazataıym oqıǵalardan saqtandyrýdy jáne eńbek jaǵdaılaryna baqylaýdy kúsheıtýdi kózdeıdi.
Buǵan deıin elimizde qansha jumysker mindetti saqtandyrýmen qamtylǵany týraly jazǵan bolatynbyz.
