Qostanaıda jerústi ótkeli salyndy
QOSTANAI. QazAqparat - Qostanaı oblysy ortalyǵyndaǵy Gashek kóshesinde jerústi ótkeliniń qurylysy aıaqtaldy, dep habarlaıdy QazAqparat tilshisi.
Qostanaı qalasy ákiminiń orynbasary Oljas Nurǵalıevtiń sózinshe, jerústi ótkeliniń qurylysyna 37 mıllıon teńge jumsaldy.
«Mundaı ótkelderdi qur bosqa sala berýge bolmaıdy. Mańynda áleýmettik nysandary kóp aýmaqtarda ornalasqany durys. Myna Gashek kóshesindegi ótkeldi pılottyq joba retinde qarastyraıyq. Jaqynda fýtbol akademııasy, parkter salynsa, bul jerge jaıaý júrginshiler kóptep keledi. Múmkindigi shekteýli jandarǵa arnalǵan jedelsatyny ornatqandaryńyzdy quptaımyn», - dedi oblys ákimi Arhımed Muhambetov.
Atalǵan jerústi ótkeli birneshe sporttyq nysan men avtoturaqty jalǵaıdy. Uzyndyǵy - 17 metr, eni - 2 metrden asady. Baǵandarynyń bıiktigi - 4,5 metr. Ótkelge saty arqyly jáne elektrkótergishpen shyǵýǵa bolady.
«Negizgi qurylys qospaly bolattan jasaldy, al shatyryna polıkarbonat qoldanyldy. Tehnıka qaýipsizdigi barynsha saqtalǵan», - deıdi qalalyq TKSh bóliminiń basshysy Alekseı Tarasov.
Aıta ketý kerek, dál osyndaı nysan kelesi jyly oblys ortalyǵyndaǵy Abaı jáne Gagarın kóshelerinde boı kóteredi dep josparlanýda. Buǵan qosa bıyl qalanyń 10 kóshesi kúrdeli jóndeýden ótedi. Taǵy 26 kóshege abattandyrý jumystary júrgizilmek.
