Qostanaıda jerdi zańsyz ıelenip alǵandar anyqtaldy
QOSTANAI. KAZINFORM – Joǵary aýdıtorlyq palata Qostanaıda jer ýchaskelerin óz betinshe ıelenip alýdyń 174 jaǵdaıyn anyqtady. Ákimdik tıisti sharalar qabyldap jatyr.
Qostanaı qalasynyń ákimdigi jer ýchaskelerin negizsiz ıelenip alýdyń 174 faktisi boıynsha tıisti sharalar qabyldady. Bul faktiler bıyl Joǵary aýdıtorlyq palata júrgizgen aýdıt barysynda anyqtaldy.
— Qostanaı oblysynda memlekettik resýrstardyń paıdalanylý tıimdiligine júrgizilgen aýdıt aıasynda Joǵary aýdıtorlyq palata Qostanaıda jerdi óz betinshe ıelenip alý belgileri bar ári quqyq belgileıtin qujattary joq ǵımarattar salynǵan jer ýchaskelerine qatysty 174 jaǵdaıdy anyqtady. Mundaı obektiler jer jáne salyq esebinen tys qalyp, bıýdjetke túsim ákelmeıdi ári qala úshin quqyqtyq belgisizdik týyndatady, — delingen JAP habarlamasynda.
Osyǵan baılanysty Qostanaı qalasynyń ákimdigine anyqtalǵan jaǵdaı boıynsha is-sharalar josparyn ázirleý tapsyryldy.
— Búginde tıisti jospar iske asyrylyp jatyr. Ol árbir jaǵdaıdy ataýly túrde tekserýdi, jer ýchaskelerin resimdeýdi, ákimshilik jaza qoldanýdy, sotqa deıingi talap qoıý jumystary men ózge de sharalardy kózdeıdi. Atap aıtqanda, jerdi zańsyz ıelenip alǵan tulǵalardy anyqtaý úshin 143 fakt boıynsha málimetter polıtsııa departamentine joldandy.
31 fakt boıynsha materıaldar Jer resýrstaryn basqarý departamentine jiberildi. Rastalǵan buzýshylyqtar boıynsha ákimshilik hattamalar jasalyp, olardy joıý týraly nusqamalar berildi, — delingen habarlamada.
Eger salynǵan obektilerdiń quqyq belgileıtin qujattary bolsa, ıeleri jer paıdalaný quqyǵyn resimdep, bıýdjetke jer ýchaskesin paıdalanǵany úshin jaldaý aqysyn nemese jer ýchaskesiniń satyp alý qunyn tóleı alady. Mundaı qujattar bolmasa, zań buzǵan adamdar aıyppul tólep, zańsyz salynǵan obektilerdi buzýǵa mindetti.
Aıta ketelik Aqmolada 121 myń gektar jer memleket menshigine qaıtarylǵan edi.
