Qostanaıda jeńil avtokólik avtobýspen soqtyǵysyp, úsh adam qaza boldy
QOSTANAI. QazAqparat - «Qostanaı-Qarabutaq» avtojolynda jeńil mashına men avtobýstyń soqtyǵysýy kezinde úsh adam kóz jumdy, dep habarlaıdy «QazAqparat» HAA Qostanaı oblysy polıtsııa departamentiniń baspasóz qyzmetine silteme jasap.
«18 qańtar kúni saǵat 14.30-da «Qostanaı-Qarabutaq» baǵytyndaǵy tasjolda 34 jastaǵy júrgizýshi «Renault Duster» avtokóligimen qarsy qozǵalys jolaǵyna shyǵyp ketip, avtobýsqa soqtyǵysqan. Jol apaty saldarynan «Renault Duster» avtokóliginiń júrgizýshisi men eki jolaýshysy oqıǵa ornynda kóz jumdy»,- deıdi polıtsııa departamentindegiler.
Avtobýs jergilikti uıymdardyń birine tıesili ekeni belgili boldy. Qazirgi ýaqytta atalǵan fakti boıynsha QR Qylmystyq kodeksiniń 345-baby boıynsha sotqa deıingi tergeý júrgizilýde.
