Qostanaıda jemqor áriptesterine shyqqan úkimge qol soqqan polıtseıler jazalanady
QOSTANAI. QazAqparat - Qostanaı oblysy ІІD jemqor polıtseılerge shyǵarylǵan úkimnen keıin sot zalynda qol shapalaqtaǵan polıtsııa qyzmetkerlerine qatysty qyzmettik tergeý taǵaıyndady.
Sot úkimi jarııalanǵanda sot zalynda ІІD jeke quramy otyrǵan, dep habarlaıdy «QazAqparat» HAA tilshisi.
ІІD baspasóz qyzmetiniń habarlaýynsha, tergeýdiń sebebi ishki ister organdary qyzmetkerleriniń Etıkalyq kodeks normalaryn buzýy bolyp otyr. Jergilikti polıtsııa qyzmetiniń basshysy, polıtsııa polkovnıgi Neǵmet Ysmaǵulovtyń aıtýynsha, «bul fakti ofıtserlik jáne polıtseılik jınalystarda da talqylanatyn bolady».
Buǵan deıin habarlanǵandaı, byltyr jazda jol polıtsııasy batalonynyń qyzmetkeri Arman Kópjasarov, ınspektor Ermek Isanov jáne zańsyz kóshi-qonmen kúres boıynsha arnaıy vzvodtyń kishi ınspektory Almat Kabenov Qarabalyq aýdanyndaǵy «Rýbej» baqylaý beketinen ótken Reseı azamattaryn bopsalap, para alǵan. Olar 5 mıllıonnan 7,5 mıllıon teńgege deıingi aıyppul arqyly bas bostandyǵyn shekteý jazasynan qutyldy. Sonymen birge, polıtsııalyq shenderinen, ishki ister organdaryna jumys isteý quqyǵynan ómir boıyna aıyryldy.
Úkimdi jarııalaý Qostanaı oblysy ІІD jeke quramy ókilderiniń qatysýymen ótti. ІІD polıtseıleri sot úkimine shapalaqtap qol soqqan.
