Qostanaıda jel elektr stantsııasynyń qurylysyn jemqorlyqqa qarsy agenttik baqylaıdy

QOSTANAI. QazAqparat – Qostanaı oblysynda jel elektr stantsııasynyń qurylysy bastaldy, dep habarlaıdy QazAqparat oblystyq Sybaılas jemqorlyqqa qarsy kúres departamentiniń baspasóz qyzmetine silteme jasap.

«Ybyraı» jel elektr stantsııasy Qostanaı aýdanynda boı kóteredi jáne jyl saıyn 179 mıllıon kılovattan astam elektr energııasyn óndirýge qaýqarly. «Protecting Business and Investments» jobasy sheńberinde quıylǵan ınvestıtsııa kólemi – 18,4 mlrd teńge.

«Osy jyldyń tamyz aıynda Qostanaı oblysy boıynsha sybaılas jemqorlyqqa qarsy is-qımyl departamenti men bas merdiger «Jel Elektrık» JShS arasynda ınvestıtsııalyq joba sheńberinde sybaılas jemqorlyqqa jol bermeý týraly kelisimge qol qoıyldy. Bul sheshim nysandy salý kezinde sybaılas jemqorlyq táýekelderin azaıtý maqsatynda qabyldandy. Bizdiń basty mindetimiz – bıznesti júrgizý úshin qolaıly jaǵdaılardy jasaý jáne qandaı da bir sybaılas jemqorlyq táýekelderin tolyǵymen joıý. Bul «Protecting Business and Investments» jobasynyń basty maqsaty sanalady. Joba aıasynda bıznestik ortada sybaılas jemqorlyqtyń aldyn alý jáne memlekettik organdarmen ózara is-qımyl barysynda ınvestorlar men kásipkerlerge kómek kórsetý júzege asyrylady», - dep atap ótti sybaılas jemqorlyqqa qarsy is-qımyl departamentiniń basshysy Qýanysh Bekbasov.

Bul aýqymdy joba memlekettiń jańartylatyn energııa kózderin damytý baǵdarlamasy arqyly iske asyrylady. Jel elektr stantsııasyn tolyq paıdalanýǵa bergende aýaǵa parnıkti gazdardyń bólinýi jylyna birneshe myń tonnaǵa azaıady. Stantsııanyń ózi myńdaǵan otbasynyń elektr qýatyna degen qajetin ótep, ony óndirýge jumsalatyn shyǵyndy birneshe eselep azaıtýǵa múmkindik beredi.

Jalpy Qostanaı oblysynda Protecting Business and Investments jobalyq keńsesi ashylǵannan beri sybaılas jemqorlyqqa qarsy 44 ret kelisim jasalǵan.