Qostanaıda jeke qorǵanys quraldarynyń eki aılyq qory jınaldy
NUR-SULTAN. QazAqparat – Qostanaı oblysynyń ákimi Arhımed Muhambetov óńirde jeke qorǵanys quraldarynyń eki aılyq qory daıyn ekenin málim etti, dep habarlaıdy QazAqparat tilshisi.
«Koronavırýs ınfektsııasynyń taralýyna jol bermeý úshin oblysta barlyq qajetti is-sharalar júrgizilýde. Oblysta juqtyrýdyń 2 354 jaǵdaıy tirkelgen. Onyń 1 176-sy sımptomsyz, 6 adam qaıtys boldy. 1480 adam nemese 63% jazyldy. Bir apta ishinde syrqattanýshylyqtyń ósýi 2,6% qurady», - dedi Arhımed Muhambetov Úkimet otyrysynda.
Ákimniń aıtýynsha, emhanalar janynda úıinde emdelýshilerge medıtsınalyq kómek kórsetetin 160 mobıldi ámbebap brıgada qurylǵan. Bıýdjetten tys qarajat esebinen Qostanaı qalasynyń emhanalary janyndaǵy mobıldi brıgadalardyń qyzmetkerleri 12 taksı avtomobılimen qamtamasyz etilgen.
«Qazirgi ýaqytta jeke qorǵanysh quraldarynyń qaldyǵy 64 myń bir rettik kostıýmdi, 4 myń kóp rettik kostıýmdi, 80 myń maskany, 200 myń qolǵapty quraıdy. Bul 2 aıdan astam merzimge jeke qorǵanys quraldarynyń qoryn qamtamasyz etedi. 2021 jyldyń aqpanyna deıin oblystyq bıýdjet qarajaty esebinen jeke qorǵanys quraldaryn qosymsha satyp alý josparlanýda», - dedi ol.
