Qostanaıda jeke ınvestorlarǵa qandaı artyqshylyq beriledi
«Jyl basynan beri oblysqa 183,7 mlrd teńge ınvestıtsııa tartyldy, munda 38,1% ósim baıqalady. Tartylǵan qarajattyń 85,6%-y – jeke ınvestıtsııalar. Investıtsııalyq tartymdylyqty arttyrý úshin biz ınvestorlardy qoldaýdyń óndiristik, kóliktik jáne servıstik ınfraqurylymyn jetildirýdi jalǵastyramyz», - dedi Q. Aqsaqalov elordada Ortalyq kommýnıkatsııalar qyzmetinde.
Ákimniń aıtýynsha, ınvestor úshin ınfraqurylymdyq alańdar qurylady. Jabdyqtardy ımporttaýda kedendik bajdardy tóleýden bosatý, zattaı granttar (múlik nemese jer ýchaskesi) berý, korporatıvtik tabys jáne jer salyǵyn, múlik salyǵyn tóleýden bosatý sekildi ınvestıtsııalyq basymdyqtar beriledi.
«Sonymen qatar, kásipkerlikti damytý jónindegi ulttyq joba sheńberinde ınvestorlar jyldyq 6%-ben 3 mlrd teńgege deıin nesıe ala alady. Al qajet bolǵan jaǵdaıda obektilerge jetispeıtin ınjenerlik ınfraqurylymdy jetkizý múmkindigi bar. Osy qoldaýdyń nátıjesinde 1 bıýdjettik teńgege 6 teńge jeke ınvestıtsııa keledi», - dep túsindirdi óńir ákimi.
Sonymen birge, Qostanaıda eki kóliktik-logıstıkalyq ortalyq salý josparlanýda. Ondaǵy «Qurǵaq port» quny 37 mlrd teńgege jetedi, 350 jumys ornyn qurý kózdelgen. Jáne qytaılyq Xian aiju (Sıanaızıý) kompanııasymen birlesken logıstıkalyq ortalyqtyń quny – 4,5 mlrd teńge jáne 100 jumys orny ashylady.
