Qostanaıda jazasyn óteýshiler merziminen buryn bostandyqqa shyǵyp jatyr
QOSTANAI. QazAqparat - Qostanaı oblysynda jazasyn óteýshiler sany edáýir azaıǵan. Bul týraly QazAqparat tilshisine oblystyq ІІD basshysynyń orynbasary Nurıddın Daýylbaev málim etti.
Qylmystyq atqarý júıesindegi sońǵy ózgerister jazasyn óteýshilerge barynsha jeńildik jasap otyr. 2008 jyly elimiz boıynsha qamaýdaǵy adamdar sany 57 myń bolsa, bıyl bul kórsetkish 35 myńǵa azaıǵan. Tek Qostanaı oblysynda 2017 jyldyń bir aıynda 121 adam merziminen buryn bostandyqqa shyqty.
«Salystyryp qarasaq,osydan týra toǵyz jyl buryn usaq qylmys jasaǵan 1184 adamnyń isi sotqa joldanyp, qamalǵan bolatyn. Al, búgingi tańda temir torǵa jabylǵandar sanyn 418-ge deıin azaıtyp otyrmyz. Túrmedegi azamattardyń jazasynyń jeńildeýine medıatsııa týraly zań da oń áser etti. Mysaly 10 jyl buryn jábirlenýshi men aıyptalýshynyń ymyralasýy arqyly nebári 537 qylmystyq is toqtatylsa, bıyl bul kórsetkish 1509-ǵa jetken. Alaıda, mundaı jeńildikter aýyr jáne asa aýyr qylmys jasaǵandarǵa qoldanylmaıdy», - dedi Qostanaı oblystyq ІІD basshysynyń orynbasary Nurıddın Daýylbaev.
Ýchaskelik ınspektor Erik Ýáısov ózine tıesili aýmaqta merziminen buryn bosaǵan 10 adam bar ekenin aıtady. Shartty jazaǵa tartylǵandarmen birge olardyń bári arnaıy esepte tur. Mundaı azamattardyń árbir basqan qadamy aıryqsha baqylaýda bolady.
«Bizge bul turǵyda probatsııa qyzmeti kómektesedi. Basty maqsat - shalys basqandardyń túzý jolǵa túsýine yqpal etý. Jumysqa ornalasýyna, qajet bolsa kásibı bilim alýyna járdemdesemiz. Qostanaı oblysynda jyl basynda 2388 adam qamaýda otyrǵan bolsa, búginge deıin sonyń 592-si bostandyqqa shyqqan», - dedi ýchaskelik ınspektor.
