Qostanaıda jazasyn ótep jatqandarǵa arnalǵan jumys jármeńkesi ótti
QOSTANAI. QazAqparat - Qostanaıdaǵy ÝK 161/2 mekemesinde ótken bos oryndar jármeńkesinde jazasyn ótep júrgender men jýyqta erkindikke shyǵatyndarǵa jumysqa qalaı ornalasý kerektigi jóninde keńes berildi, dep habarlaıdy «QazAqparat» tilshisi.
Jármeńkeni uıymdastyrýshylardyń aıtýynsha, mundaı sharalardyń basty maqsaty jazasyn ótep shyqqandardyń áleýmettik máselelerin sheship berý.
«Grınada», «Leskor», KBK «Group», «Eńbek» sııaqty seriktestikter men mekemeler 40-tan astam bos oryndar usyndy. Erkindikke jýyqta shyǵatyndar ózderin qyzyqtyrǵan bos oryndarmen tanysyp, mamandardan aqyl-keńester aldy. Sonymen qatar olarǵa kásiptik bilim berý jaǵy da qarastyrylǵan.
Eń kóp tańdalǵan bos oryndar qatarynda slesar, santehnık, mebel jasaýshy sııaqty mamandyqtar bar.
«Munda 11 jyldan beri otyrmyn, jumysym bar, bos oryndar ishinen avtoelektrık mamandyǵyn tańdap aldym, erkindikke shyqqan soń KBK «Group» JShS-na jumysqa ornalaspaq oıym bar», - deıdi esirtki saqtap taratqany úshin bas bostandyǵynan aıyrylǵan Jeńis Nurmanov.
