Qostanaıda jazasyn ótep shyqqan múgedek jumysqa ornalasty
ASTANA. QazAqparat - Qostanaı oblysynda probatsııa qyzmetiniń esebinde turǵan sottalǵandarǵa áleýmettik-quqyqtyq kómek kórsetý jumystary belsendi júrgizilip jatyr, dep habarlaıdy QR ІІM QAJ komıtetiniń baspasóz qyzmeti.
Esterińizge sala keteıik, ótken jyldyń sońynda Memleket basshysynyń Jarlyǵymen «Qazaqstan Respýblıkasyndaǵy bas bostandyǵynan aıyrý oryndarynan bosatylǵan jáne probatsııa qyzmetinde esepte turǵan azamattardy áleýmettik ońaltýdyń 2017-2019 jyldarǵa arnalǵan keshendi strategııasy qabyldanyp, sondaı-aq «Probatsııa týraly» zańǵa qol qoıylǵan bolatyn. Atalǵan normatıvtik quqyqtyq aktiler qabyldanǵan ýaqyttan beri, osy baǵyttaǵy jumys jandandyrylyp keledi. Ádette temir tordan bosap shyqqan azamattardy qoǵam «jat» kórip, ótken ómirin synǵa alyp jatady. Olar erkindikke shyqqannan keıingi ómirin bulyńǵyr, qalyń tuman sekildi kóredi. Jumyssyzdyq, kásipke beıimsizdik, qoǵamnyń qabyldamaýy, memlekettiń qoldamaýy olardy temir torǵa qaıta aparatyny anyq. Qazirgi tańda olardy qaıta áleýmettendirilip, qalypty ómir súrýine jaǵdaılar jasalýda.
Elimizde jyl basynan beri probatsııa qyzmetiniń esebinde turǵan 8814 adamǵa 10 myńǵa jýyq túrli áleýmettik-quqyqtyq kómekter (jumysqa ornalastyrý, bilim berý, qujattaný, medıtsınalyq, quqyqtyq, psıhologııalyq, materıaldyq, t.b.) kórsetilgen. Oǵan mysaldar jeterlik.
Jaqynda Qostanaı óńiriniń QAJ qyzmetkerleri jazasyn ótep shyqqan 52 jastaǵy ІІІ toptaǵy múgedek kisige kómek kórsetti.
«Múmkindigi shekteýli bul azamatty Naýryzym aýdandyq probatsııa qyzmetiniń esebine qoıǵan ýaqytta oǵan qandaı áleýmettik kómekter qajettigi kórsetilgen jeke baǵdarlama jasaldy. Atap aıtatyn bolsaq, materıaldyq, quqyqtyq jáne medıtsınalyq kómekter kórsetildi, ony jumysqa ornalastyrdy», - deıdi Qostanaı oblysy boıynsha QAJ departamenti probatsııa bóliminiń bastyǵy Qanat Ryşanov.
Sondaı-aq, bas bostandyǵynan aıyrý mekemesinen bosap shyqqan azamat S. birjolǵy járdemaqy aldy. QAJ qyzmetkerleri onyń áleýmettik statýsyn eskere otyryp, tolyq medıtsınalyq tekserýden ótkizdi, protezdik-ortopedıalyq kómek alýy úshin jergilikti densaýlyq saqtaý organdarynyń yqpalymen «Sosnovyı bor» shıpajaıyna emdelýge jiberildi.
Atalǵan azamat jeke baǵdarlama aıasynda «Jol kartasy - 2020» baǵdarlamasyna qatysty, nátıjesinde oǵan qaıtarymsyz nesıe berilip, aıaq kıim jóndeý sheberhanasyn ashty.
Kelesi bir mysalda úsh jylǵa bas bostandyǵynan shekteýge sottalǵan Qostanaı oblysynyń turǵyny 47 jasar Edýardqa naqty áleýmettik kómek alýyna járdemdesti. Bul kisi ózge bireýdiń kómeginsiz qozǵala almaıdy. Ol QAJ qyzmetkerleriniń baqylaýyna túskenge deıin áleýmettik statýsyn anyqtaı almaǵan. Alaıda qyzmetkerler oǵan densaýlyǵyna baılanysty járdemaqy alýǵa qujattaryn resimdep, járdemaqy alýǵa kómektesti, munymen qosa oǵan múgedektik arbasy berildi.
