Qostanaıda jazasyn ótep kelgender arnaıy jataqhanada turatyn boldy
Qostanaı oblysynda 2018 jylǵy qańtar aıynan bastap jazasyn ótep shyqqan 264 azamat probatsııa qyzmetine tirkelgen. Basty maqsat - olardyń qoǵamnan shet qalmaı, erkin turmysqa tóselip ketýine qolaıly jaǵdaı týǵyzý. Oblys ákiminiń orynbasary Marat Júndibaevtyń sózinshe, bul maqsatqa múddeli memlekettik mekemelermen qatar, qoǵamdyq negizdegi ózge de uıymdar belsene atsalysýy tıis.
«Búginde óńirlik probatsııa qyzmeti túzeý mekemelerinen bosap shyqqandardy ońaltý jumystaryna túrli úkimettik emes uıymdar men qoǵamdyq birlestikterdi tartyp otyr. Bıyl bul baǵytta 54 memorandýmǵa qol qoıylǵan. Alaıda óńirde túzeý mekemelerinen bosap shyǵyp, qıyn jaǵdaıǵa dýshar bolǵan azamattarǵa quqyqtyq-áleýmettik kómek kórsetýmen aınalysatyn úkimettik emes uıymdar joqtyń qasy. Osy olqylyqtyń ornyn toltyrý kerek. Tipti, jazasyn ótep kelgenderge arnaıy jataqhanalar salynýy múmkin», - deıdi M.Júndibaev.
Qylmystyq atqarý júıesi departamenti ókilderiniń aıtýynsha, probatsııa qyzmetinde tirkelgen azamattarǵa tegin quqyqtyq-áleýmettik kómek kórsetý úshin úkimettik emes uıymdarǵa oblys bıýdjetinen qosymsha qarjy bólinýi tıis.
Jıynda sottalǵandarǵa bólinetin kvota máselesi de sóz boldy. Oblystyq QAJD basshysy N. Mýsınniń aıtýynsha, bıyl oblys ákimdigi jazasyn ótep shyqqan jáne probatsııa qyzmetine tirkelgen 193 azamatty jumysqa ornalastyrý maqsatynda kvota bólgen. Alaıda qazirgi tańda osy azamattardyń 83-i ǵana eńbekpen qamtylǵan. Óıtkeni olardyń kóbiniń mamandyǵy joq. Bolǵannyń ózinde, ol mamandyqqa eńbek naryǵynda suranys bolmaı otyr.
Marat Júndibaev atalǵan máselelerdi ábden pysyqtap, aldaǵy jyldyń jumys josparyna engizý qajettigin aıtty. Sottalǵandar men probatsııa qyzmetinde esepte turǵandardy mamandyqqa oqytý, biliktilikke qaıta daıarlaý kýrstaryn uıymdastyrý sharalary jumyspen qamtýdy úılestirý jáne áleýmettik baǵdarlamalar basqarmasyna tapsyryldy. Munyń syrtynda, atalǵan sanattaǵy azamattarǵa arnalǵan bos jumys orny jármeńkeleri de tıisinshe jıi uıymdastyrylýy tıis.
Jıyn barysynda túzeý mekemesinen bosap shyqqan azamattardyń erkin ómirge aralasyp, el qatarly túzý turmys keshýine kóp bolyp yqpal etýdiń 2019 jylǵa arnalǵan keshendi jospary talqylandy. Aldaǵy jyly jazasyn ótegenderdi erkin ómirge beıimdeý, ońaltý, eńbekpen qamtý sharalaryna qoǵamdyq birlestikter men úkimettik emes uıymdar kóptep tartylmaq.
