Qostanaıda jaıaý júrginshini qaǵyp óltirgen avtobýs júrgizýshisi sottaldy

QOSTANAI. QazAqparat - Qostanaıda jaıaý júrginshini qaǵyp ketken avtobýs júrgizýshisi jazaǵa tartyldy, dep habarlaıdy QazAqparat oblystyq sottyń baspasóz qyzmetine silteme jasap.

2020 jylǵy 28 jeltoqsanda sottalýshy joldy belgilenbegen jerden kesip ótken jaıaý júrginshini qaǵyp ketti.

«Jol-kólik oqıǵa saldarynan 1940 jyly týǵan jábirlenýshi S. alǵan aýyr dene jaraqatynan oqıǵa ornynda qaıtys boldy. Prokýror 3 jylǵa bas bostandyǵynan aıyrý, kólik quraldaryn basqarý quqyǵynan 3 jylǵa aıyrý jazasyn berýdi surady»,- dep habarlady sotta.

Jaza taǵaıyndaý kezinde sot jaýaptylyqty jeńildetetin mán-jaı retinde turǵylyqty jeri men jumys orny boıynsha oń minezdeme, buryn sottalmaǵanyn eskerdi.

Іs boıynsha aýyrlatatyn mán-jaılar anyqtalǵan joq. Sotta jábirlenýshi sottalýshyǵa bas bostandyǵynan aıyrýmen baılanysty emes jaza taǵaıyndaýdy surady.

«Jábirlenýshiniń ólimine ákelgen oqıǵanyń aýyrlyǵyn jáne sottalýshynyń jeke basyn eskere otyryp, sot oǵan eń tómengi qaýipsizdik qylmystyq-atqarý júıesi mekemesinde jazasyn óteı otyryp, 3 jyl merzimge kólik quraldaryn basqarý quqyǵynan aıyra otyryp, 2 jyl 6 aı merzimge bas bostandyǵynan aıyrý túrindegi jaza taǵaıyndady. Sottalǵan V. sot zalynda qamaýǵa alyndy», - delinedi sotta.

Sondaı-aq sot úkimimen jábirlenýshiniń paıdasyna 500 myń teńge kóleminde moraldyq zııan óndirildi. Úkim zańdy kúshine engen joq.