Qostanaıda jastarǵa qyzmet kórsetý ortalyǵy ashyldy
Bul ortalyq Qostanaıda jańadan ashylǵan Jastar saraıynda ornalasqan. Oblystyq jastar resýrstyq ortalyǵy, jastar bastamalaryn qoldaý bóliminiń jetekshisi Marat Joldybaevtyń sózinshe, mundaı ortalyq zaman talabynan týyndap otyr.
«Bul ashylyp otyrǵan Jastarǵa qyzmet kórsetý ortalyǵy jastardyń jańa ıdeıalary men jobalaryna baǵyt beredi, kúsh-jigerin biriktirip, túrli máseleleri boıynsha kómek kórsetedi. Jastardyń bilimin jetildiretin, ári pikir alysatyn, olardy jan-jaqty qoldaýǵa barlyq múmkindikter jasaıtyn ortaq shańyraq bolady dep senemiz. Ekinshiden, jastardyń bos ýaqytyn tıimdi de paıdaly uıymdastyrý jumysyn úılestirip otyrmaq. Oǵan ǵımaratta atap ótken zamanaýı qurylǵylar men bólmelerde barlyq múmkindikter bar», - deıdi Marat Joldybaev.
Jastar ortalyǵy túrli baǵytta jumys júrgizedi. Olar: bıznesti qoldaý, jastaǵa psıhologııalyq kómek kórsetý, zań salasyndaǵy keńes jáne t.b. Qazir munda 10 maman jastarǵa aqparat berý, qyzmet kórsetý boıynsha jumys atqarady.
Kásipkerlikti damytý, memlekettik baǵdarlamalardy damytý sektorlaryna arnaıy mamandardy shaqyrylǵan. Tájirıbeli qyzmetkerler «Jumyspen qamtý-2020», «Dıplommen aýylǵa», «Serpin» baǵdarlamasy, «Turǵyn úı» memlekettik baǵdarlamalary boıynsha jastarǵa baǵyt-baǵdar beredi.
Eske salsaq, Memleket basshysy Qasym-Jomart Toqaev Qostanaı oblysyna jumys sapary barysynda jastar bastamalaryn jan-jaqty qoldaý kerektigin aıtqan bolatyn.