Qostanaıda jastardyń ózine-ózi qol jumsaý oqıǵalary kóbeıip otyr
QOSTANAI. QazAqparat - Qostanaı oblysynda jasóspirimder arasyndaǵy sýıtsıd oqıǵasy kóbeıgen. Bul týraly oblystyq bilim basqarmasynyń keńeıtilgen alqa Qostanaı oblysy ákimdigi bilim basqarmasynyń basshysy Bátıma Daýmova aıtyp berdi, dep habarlaıdy QazAqparat.
Basqarma basshysy atap ótkendeı, búginde óńirdegi jastardyń ózine-ózi qol jumsaý faktileriniń kóbeıgeni alańdatarlyq jaǵdaıda.
«Jasóspirimderdiń aýtodestrýktıvti tártibi bilim salasynyń ókilderin alańdatyp otyr. Jalpy, eki jyl ishinde oblystaǵy sýıtsıd kórsetkishi 42 paıyzǵa deıin artqan. Sondaı-aq, sýıtsıd jasaýǵa ıtermeleýdiń 33 faktisi tirkelgen. Máselen, sońǵy eki aıda eki jasóspirim ózderine qol jumsaǵan. Onyń biri Rýdnyı qalasynda, ekinshisi Denısov aýdanynda bolǵan», - dedi basqarma basshysy.
Osy máselege qatysty oblysta birneshe jıyn ótip, jumys toby quryldy. Psıhologtar arnaıy jospar quryp, oqýshylarmen únemi jumys istep otyrady.
«Jumys toby qańtar aıynan bastap Qostanaı, Rýdnyı qalalary, Denısov, Qarabalyq, Qostanaı aýdandaryna baryp, kezdesýler uıymdastyrdy. Olar jyl sońyna deıin óńirdi barlyq qala-aýdandaryn aralamaq. Topqa bilikti psıholog mamandar, tájirıbeli pedagogtar alyndy. Buǵan qosa, oblysta BUU janyndaǵy balalarǵa kómek berý tótenshe qory bastama bolǵan baǵdarlama júzege asyrylady. Atalǵan baǵdarlamanyń tıimdiligi Qazaqstannyń birneshe oblysyndaǵy sýıtsıd kórsetkishiniń tómendegenimen baılanystyrylady», - dedi B.Daýmova.
Óz kezeginde oblys ákimi Arhımed Muhambetov jasóspirimder arasyndaǵy sýıtsıd kórsetkishiniń joǵarylaýyn kún tártibindegi ózekti másele dep atap ótti. Ol aýdan, qala ákimderine profılaktıkalyq jumystar júrgizip, máseleni aıryqsha baqylaýǵa alýdy tapsyrdy
