Qostanaıda jastardyń 143 jobasy granttyq qarjylandyrýǵa ıe boldy
Elimizde Zhas Progect jastar korpýsyn damytý jobasy bastalǵaly bir jyl toldy. Atalǵan bastama jumyssyz jáne joǵary bilimi joq jastardyń óz isin bastaýyna múmkindik beredi. Qostanaıda bıyl qolǵa alynǵan naýqandy sharaǵa qatysýshylardyń sany kóp. Búgin óńirlik kommýnıkatsııalar ortalyǵynda ótken baspasóz májilisinde jobanyń oblys boıynsha aımaqtyq úılestirýshisi Erlan Tóletaev jýrnalısterge suhbat berdi.
«Bul áleýmettik jobanyń avtorlary - Búkilálemdik bank pen QR Bilim jáne ǵylym mınıstrligi. Alǵashqy jyly 4 oblysta: Almaty, Qaraǵandy, Pavlodar jáne Ońtústik Qazaqstanda pılotty túrde júzge asqan edi. Nátıjesinde, elimizde 2 myń adam qamtylyp, 589 áleýmettik joba ómirge keldi. Qostanaı oblysy qatarǵa bıyldan bastap qosylyp otyr. Bul joba 2020 jylǵa deıin jalǵasyp, búkil Qazaqstandy qamtıdy. Maqsaty - jastardy, ásirese turmysy tómen top ókilderin qoǵam ómirine aralastyrý jáne qoǵamǵa paıdaly isterge úıretetin baǵdarlama arqyly olardy belsendi, tabysty ómir súrýge talpyndyrý. Buǵan 14-29 jas aralyǵyndaǵy jastar qatysa alady», - dep túsindirdi Erlan Tóletaev.
Áleýmettik bastamasyn alǵa júrgizý úshin granttyq konkýrsqa qatysyp jatqandar da jeterlik. Granttyń shekti somasy - 1 mln teńge. Onyń syrtynda, jobanyń ár qatysýshysy aı saıyn 60 000 teńge (JOO túlekteri) jáne 40 000 teńge stıpendııa alyp turady. Jobasyn ilgeri bastyrýdyń qyr-syryn úırenip, arnaıy spıkerlerdiń keńesin alyp otyrady. Qostanaı oblysynda 429 qatysýshy júzege asyratyn 143 joba granttyq qarjylandyrýǵa ıe boldy. Olardan endigi talap etiletini - beldi bekem býyp, óz isterin júrgizý ǵana. Olaı bolmaǵan jaǵdaıda grant qarjysy keri qaıtaryp alynady.
«Ár qatysýshynyń ortaq saıtta jeke kabınetteri bar. Sol jerde aı saıyn jobanyń júzege asý barysy jaıynda fotosymen birge dáıekti esep berip otyrýlary tıis. Mentor-jattyqtyrýshylar da olardy toqsan saıyn aralap tekserip, qarjy bólý, esep toltyrý, táýekelder men nátıjelerdi baǵalaý, is júrgizý syndy qabiletterge úıretip, keńes berip turady», - deıdi joba úılestirýshisi.
Spıkerlerdiń aıtýy boıynsha, kez kelgen talap bildirgen jasqa joba qatysýshysyna aınalý múmkindigi bar. Qazirdiń ózinde Arqalyqtan - 4, Lısakovtan - 7, Rýdnyıdan 13 ótinim kelip tústi.
