Qostanaıda jas otbasy eki balasymen baspanasyz qaldy
QOSTANAI. QazAqparat - Búgin qala irgesindegi Mıchýrın aýylynda jas otbasynyń úıi órtenip ketti, dep habarlaıdy QazAqparat.
Qostanaı oblysy TJD baspasóz qyzmetiniń habarlaýynsha, búgin saǵat 00:10-der shamasynda Ozernyı kóshesindegi jeke turǵyn úılerdiń biri otqa orandy.
«Órt aýqymy 100 sharshy metrdi qurady. Qyzyl jalyn saǵat 03:36-te tolyqtaı sóndirildi. Zardap shekkender bolmaǵanymen, jas otbasy barlyq múlikterinen, kıim-keshek, baǵaly zattarynan aıyryldy. Órt bastalǵan ýaqytta otbasy músheleri uıyqtap jatqan», - dep málim etildi baspasóz qyzmetinde.
Úı ıesi Olesıa Holoshenkonyń sózinshe, joldasy eki balany kórpeshege orap, syrtqa shyǵaryp úlgergen.
«Aldymen dárethananyń tóbe jabynǵysy jandy. Odan shyqqan alaý shatyrdy sharpydy. Órt sóndirýshiler kelgenshe, úıdiń teń jartysy janyp ketken»,- deıdi ol.
Belgili bolǵandaı, bul otbasy úıdiń qurylysyn úsh jyl buryn ǵana aıaqtaǵan. Qazir olar úı mańyndaǵy monshany panalaýǵa májbúr. Al jergilikti atqarýshy organdar olarǵa qarjylaı kómek bere almaıdy. Sebebi, olar osy ýaqytqa deıin jer ýchaskesin jaldap turyp kelgen.
«Jer basqa bireýdiń atynda turǵan soń da biz áldebir jeńildikterge úmit artpaımyz. Ázirge kórshi-kólem, týystarymyz bergen kıim-keshek, aqshany talǵajaý etýge týra keledi», - dedi Holoshenko agenttik tilshisine.
