Qostanaıda jas dárigerlerdi qoldaý úshin 200 mln teńge bólindi
QOSTANAI. QazAqparat - Bıyl Qostanaı oblysynda dárigerler tapshylyǵyn joıý úshin júıeli jumystar júrgizilýde. Soǵan baılanysty 200 mln teńgeden astam qarajat bólinedi, dep habarlaıdy QazAqparat tilshisi.
Oblys ákimi Arhımed Muhambetovtiń qatysýymen ótken densaýlyq saqtaý basqarmasynyń alqa májilisinde kadr tapshylyǵy máseleleri talqylandy. Densaýlyq saqtaý basqarmasynyń basshysy Vıacheslav Dýdnıktiń málimetinshe, búginde oblysta 350 dáriger jetispeıdi. Onyń ishinde aýyldarǵa 100-den astam dáriger qajet. Ássirese, akýsherler men feldsherler joqtyń qasy. Byltyr emdeý mekemelerine 100-ge jýyq dáriger tartyldy. Olardyń arasynda onkologtar, bala dárigerleri, terapevt jáne hırýrgııa salasynyń mamandary bar.
«Sonda da, oblys aýrýhanalary men emhanalarynda aq jeleńdiler jetispeıdi. Jergilikti bılik qalada jumys isteýge kelgen jas mamandarǵa 500 myń teńgeden, aýyldyq jerlerge at basyn burǵysy kelgenderge 2,5 mln teńgege deıin kóterme aqy usynady. Onyń syrtynda, olar eńbekaqysyna qosymsha yntalandyrý múmkindikterine ıe bolady. Byltyr jas dárigerlerdi qoldaý úshin 56 mln teńge jumsadyq», - deıdi Vıacheslav Dýdnık.
Al oblys basshysy medıtsınalyq kadrlardyń jetispeýshiligin sheshý úshin keshendi sharalar qabyldaý kerektigin aıtty. Sonyń biri - basqa oblystardan maman shaqyrtý. Mysaly, qazirgi ýaqytta jas mamandardy tartý maqsatynda Batys Qazaqstannyń medıtsınalyq ýnıversıtetimen kelisim jasalǵan.
«Qazir «Dıplommen - aýylǵa» baǵdarlamasy boıynsha qoldaý sharalary kúsheıdi. Buryn ár mamanǵa 170-180 myń teńge beretin bolsaq, endi bul soma áldeqaıda ósedi. Sol úshin taǵy 100 mln teńge qarastyryp otyrmyz. Bul qarajat basqa oblystardan kelgen jastardy qoldaýǵa arnalǵan. Budan bólek, aýyldaǵy emhanalarǵa 134 mln teńge bólemiz», - dedi aımaq basshysy.
Jıynda aıtylǵandaı, kadr tapshylyǵynyń kesirinen týberkýlez, ana men bala ólimi, qan aınalý júıesi, qaterli isik aýrýlary boıynsha Qostanaı oblysy táýir kórsetkishke qol jetkize almaı keledi.
