Qostanaıda jas dárigerler forýmy ótti

Jas dárigerlerge arnalǵan úshinshi respýblıkalyq forým Qostanaı qalasynda uıymdastyryldy. Oǵan Qostanaı, Aqmola, Soltústik Qazaqstan oblysynyń jas mamandary qatysty. Dıalog alańynda densaýlyq saqtaý júıesi jumyskerleriniń salalyq kásiptik odaǵynyń ókilderi iske asyrylatyn áleýmettik sharalarǵa toqtaldy. Jalpy, bıyl Qostanaı oblysynda dárigerler tapshylyǵyn joıý úshin júıeli jumystar júrgizilýde. Soǵan baılanysty 200 mln teńgeden astam qarajat bólinedi. Onyń 40 mln teńgesi aýyldyq jerlerge jumys isteýge barǵan jas mamandarǵa kóterme járdemaqy tóleý maqsatynda qarastyrylǵan. Gıppokratqa ant bergen azamattardy baspnamen qamtý jaǵy da nazardan tys qalmady.

«Jas dárigerlerdiń páter alýy úshin nesıeniń alǵashqy 20 paıyzyn memleket sýbsıdııalaıdy. Osy maqsatta 120 mln teńge turǵynúı sertıfıkattaryna jumsalady. Tek osy jyly ǵana elimizdiń 90 jas dárigerine páter beriledi», - dedi densaýlyq saqtaý júıesi jumyskerleriniń salalyq kásipodaǵynyń tóraǵasy Saparbek Dúısenov.

Bıyl aýyldyq jerlerge jumys isteýge barǵan aq jeleńdilerge 500 myń teńge kóleminde kóterme járdemaqy tólenedi. Sonymen qatar, jas dárigerlerdiń basyn qosqan alańda kadrlyq áleýetti damytýda qosymsha granttar bólinetini málim boldy.

Dárigerler tapshylyǵy Qostanaı oblysy úshin óte ótkir másele. Emdeý mekemelerin kadrlarmen tolyqtyrýǵa memlekettik jáne jekeshelik áriptestik negizinde keshendi sharalar júzege asyrylatyn bolady. Byltyr jergilikti bıýdjet esebinen 100 dáriger astyqty aımaqqa keldi. Onyń 30-y qyzmetterin aýyldarda jalǵastyrǵan.

Forýmda densaýlyq saqtaý salasyndaǵy 12 jas mamanǵa jarty mln teńge kóleminde sertıfıkattar berildi. Jalpy, sońǵy 3 jylda oblysta densaýlyq saqtaý salasyn damytýǵa 5,2 mlrd teńge bólindi. Qarjylaı qoldaý 8 ese ósken. Dárigerlerdiń biliktiligin arttyrý jaǵy da jolǵa qoıylǵan. Dıalog alańyna qatysqan aq halatty abzal jandar Elbasynyń densaýlyq saqtaý salasyna qatysty belgilegen tapsyrmalaryn júzege asyrýǵa atsalysyp, el ıgiligi úshin eńbek etetinderin jetkizdi.