Qostanaıda jańa jyl shyrshasyn bezendirýge qomaqty qarjy bólindi
QOSTANAI. QazAqparat - Búgin turǵyndar Qostanaıdaǵy basty shyrshanyń shamyn jaǵý saltanatyn tamashalaýǵa jınaldy, dep habarlaıdy "QazAqparat" HAA tilshisi.
Bul sharaǵa qala ákimi Bazyl Jaqypov qatysty. Ol óter jyldyń basty jańalyqtaryn jipke tizip, jurtshylyqty alda kele jatqan jańa jylmen quttyqtady.
«Bıyl Qazaqstan úshin de, bizdiń oblys úshin de aıtýly jyl boldy. Almatyda ótken Qysqy Ýnıversıada men búkilálemdik «EKSPO-2017» kórmesin aıryqsha atap ótý kerek. Oblysymyzda da ıgi ister atqaryldy. Joldar jóndelip, óńirlerde jańa ǵımarattar salyndy. Sondaı-aq, oblys ortalyǵynda birneshe sporttyq jáne áleýmettik nysan boı kóterdi. Aldaǵy jyldan da úmit kóp! Kele jatqan jańa jyl qutty bolsyn!», - dedi Bazyl Jaqypov.
Munan soń jańa jyldyń basty keıipkeri - Aıaz ata sıqyrly taıaqshasymen sulý shyrshany jaryqtandyryp, ot-shashýǵa ulasty. Óner ujymdary kontserttik baǵdarlamalaryn usyndy.
Eske salaıyq, qalany Jańa jyl merekesine oraı bezendirýge 18 mln teńge bólindi. Daıyndyq jumystary 1 jeltoqsanda bastaldy.
