Qostanaıda jańa ınfektsııalyq aýrýhananyń qurylysy aıaqtaldy
Koronavırýs juqtyrǵan naýqastar jatatyn bul aýrýhananyń zamanaýı emdeý qurylǵylarymen qamtylǵan zerthanasy, dıagnostıka ortalyǵy, hırýrgııa bólimi bar. Infektsııalyq ortalyqtyń basty ereksheligi – mundaǵy naýqastarǵa arnaıy qondyrylǵan planshetter arqyly qashyqtan baqylaý jasalady.
«Bul COVID-19-ǵa qarsy kúres sharalary aıasynda salynǵan kópsalaly ınfektsııalyq aýrýhana. Mundaǵy árbir tósekte ottegige qosylý múmkindigi qarastyrylǵan. Sondaı-aq biz munda BMS júıesin engizdik. Dárigerler endi naýqastyń jaı-kúıin planshet arqyly qashyqtan-aq tekserip, qorytyndy shyǵara alady. Infektsııalyq ortalyq 200 naýqasqa shaqtalǵan. 20 oryndyq jan saqtaý bólimi, endoskopııalyq jáne ýltradybyspen emdeý bólimi taǵy bar», – deıdi joba jetekshisi Aıdan Narymbaev.
Infektsııalyq aýrýhanada bir oryndy jáne eki, úsh oryndy palatalar bar. Oblystyq aýrýhana dárigerler men medbıkelerdi daıyndap jatyr. Injenerlik quram jasaqtalýda.
Jańa aýrýhanany taza jáne las aımaqqa bólip turatyn 8 modýl qarastyrylǵan. Ortalyq ǵımarattarynyń qos qaptalynda bir-birine qarama-qarsy ornalasqan eki esik bar. Koronavırýs juqtyryp, aýrýhanaǵa jetkizilgen naýqastar birinshi esikten kiredi. Al dertinen aıyqqan adamdar ǵımarattyń ekinshi jaǵyndaǵy basqa esikten shyǵady.
Bir qabatty aýrýhana ǵımaratynyń jalpy aýdany 6800 sharshy metr bolady. Aıdan Narymbaevtyń aıtýynsha, munda aýany tazartyp otyratyn keri jeldetkish ornatylǵan. Aýrýhanadaǵy barlyq aýa arnaıy zararsyzdandyrý qurylǵysy arqyly súzgiden ótedi.
