Qostanaıda jańa halyqaralyq áýe reısteri ashylýy múmkin
QOSTANAI. QazAqparat - Qostanaıdyń halyqaralyq áýejaıynda jańa reıster ashylýy múmkin, dep habarlaıdy QazAqparat oblystyq jolaýshylar kóligi jáne avtomobıl joldary basqarmasynyń basshysy Baqytbek Esenǵulovqa silteme jasap.
Qostanaıdyń halyqaralyq áýejaıyndaǵy ushý-qoný jolaǵyn jóndeý jumystary aıaqtaldy. Bul jumystarǵa 4,6 mlrd teńge qarjy bólindi. Nátıjesinde, áýejaı kólemdi júk borttaryn jetkizip, qabyldaı alatyn múmkindikke ıe.
«Ushý-qoný jolaǵyn jóndeý jumystarynyń aıaqtalýymen áýejaıda jańa baǵyttar ashýǵa múmkindik aldyq. Endi jazda ǵana emes, qys aılarynda da «Qostanaı-Gannover(Germanııa)» baǵytynda ushýǵa bolady. Bul týraly Air Astana kompanııasymen kelissózder júrgizilýde. Osy áýe jolynyń ashylýy qostanaılyqtar úshin jaqsy jańalyq bolary sózsiz», - dedi Baqytbek Esenǵulov.
Basqarma basshysynyń aıtýynsha, aldaǵy ýaqytta Shymkent-Qostanaı-Ekaterınbýrg reısi ashylady. SCAT Airlines áýe kompanııasymen kelisim jasalyp jatyr. Sonymen qatar, qostanaılyqtar Aqtóbe men Atyraýǵa tikeleı ushýy múmkin. Sebebi, atalǵan baǵyttarǵa halyqtyń suranysy joǵary.
Aıta keteıik, áýejaı qyrkúıek aıyna deıin QR Investıtsııalar jáne damý mınıstrliginiń balansynda bolyp keldi. Atalǵan nysan jaqynda respýblıkalyq menshik tiziminen alynyp tastalyp, kommýnaldyq menshikke ótti.
