Qostanaıda jańa boksıt kenishteri ashyldy
QOSTANAI. QazAqparat - Qostanaıda jańa karerler iske qosyldy. Jańa ashylǵan ken oryndary Pavlodar alıýmınıı zaýytyn shıkizatpen qamtamasyz etedi, dep habarlaıdy QazAqparat. Karerlerdiń qurylysyna 6 mıllıard teńgeden astam ınvestıtsııa jumsaldy.
«2018 jylǵa arnalǵan óndiristik jospardy tolyq oryndaý úshin Aıat kenishiniń №9 jáne Krasnogor kenishiniń №17 karerin paıdalanýǵa berip otyrmyz. Atalǵan nysyndardyń qurylysy eki jyl buryn qolǵa alyndy. Búginde №17 karerdegi kenniń alǵashqy tonnasy óndirildi. Jyl aıaǵyna deıin 1 mln tonna shamasynda boksıt kenin óndirý josparlandy. Al, Aıat kenishiniń №9 karerinde boksıttiń óndirisi jaqynda bastalady. Onyń uzyndyǵy - 700, eni - 600, tereńdigi 119 metr bolady», - deıdi Krasnooktıabr boksıt ken basqarmasynyń dırektory Sergeı Şelokov.
Sonymen qatar boksıt tógetin qoımaǵa aparar tasjoldyń qurylysy da aıaqtaldy. Sý tartqysh pen úsh elektr jelisi tartyldy. Jalpy, óndiris alańyna bes ekskavator, toǵyz júk kóligi, úsh býldozer men bir avtogreıder jumyldyrylǵan.
Şelokovtyń aıtýynsha, Krasnooktıabr boksıt ken basqarmasynda taǵy bir karerdiń qurylysy júrip jatyr. Jospar boıynsha ol 2020 jyly qoldanysqa beriledi.
