Qostanaıda jańa avtobýs baǵyty paıda boldy
QOSTANAI. QazAqparat - 6 sáýirde senbiden bastap Qostanaıda №42 marshrýttyq avtobýs jolaýshylar tasymaldaı bastaıdy, dep habarlaıdy QazAqparat.
Qostanaı qalasy ákimdiginiń baspasóz qyzmetiniń agenttik tilshisine habarlaǵanyndaı, jańa avtobýs baǵyty arqyly jolaýshylar qalalyq zırat mańyndaǵy aıaldamaǵa deıin bara alady.
«Bul avtobýs ár senbi-jeksenbide saǵat tańǵy 8.00-den keshki 18.00-ge deıin jumys isteıdi. Ázirge bir ǵana kólik qyzmet kórsetedi. Marshrýt Altynsarın kóshesinen, ıaǵnı «Rabochıı», «Ortalyq bazar» aıaldamalarynan bastalady. Odan ári Baımaǵambetov kóshesi arqyly Táýelsizdik kóshesin boılaı kelip, ál-Farabı dańǵylyna burylyp, temir jol vokzalyna deıin barady», - dedi qala ákiminiń baspasóz qyzmetindegiler.
Atalmysh avtobýs Doşanov, Máýlenov, Karbyshev jáne Ýralskıı kósheleri boıyndaǵy aıaldamalar arqyly qalalyq zıratqa kelip toqtaıdy. Aıta keteıik, mundaı qajettilik turǵyndary tarapynan bolǵan usynystan týyndap otyr.
