Qostanaıda jalǵan qujat jasaǵan TJ qyzmetkeri sottaldy
QOSTANAI. QazAqparat - Oblystyq TJD-ǵa qarasty Qarabalyq aýdany tótenshe jaǵdaılar boıynsha ınjenerlik bóliminiń eks-basshysy Marat Jakıevke qyzmettik jalǵandyq jasaǵany úshin úkim shyǵaryldy, dep habarlaıdy «QazAqparat» HAA tilshisi oblystyq sottyń baspasóz qyzmetine silteme jasap.
M.Jákıev D.Nurmaǵambetovke sot sheshimimen tárkileýge alynǵan múlikti jasyrýǵa kómek kórsetip, tabıǵı jáne tehnogendik apattardyń memlekettik esebin júrgizý erejeleriniń normalaryn buzǵan.
«Marat Jakıev qyzmettik múmkindigin asyra paıdalanyp, 2017 jyldyń 30 shildesinde 23.00-de bolǵan órt týraly jalǵan qujat jasaǵan. 2011 jyly shyqqan «Volkswagen Polo» avtokóliginiń motor bóligi órtengendigi týraly aqparat taratý úshin ol kúıgen mashınanyń jalǵan fotosýretterin daıyndaǵan. Internetten taýyp alǵan sýretke arnaıy redaktorlyq baǵdarlamalardyń kómegimen túzetý jasap, memlekettik nómirin qoldan jasap japsyrǵan», dep habarlaıdy sottyń baspasóz qyzmeti.
Ary qaraı ol jalǵan qujatty Qarabalyq aýdandyq ishki ister bólimine tapsyrady.
Nátıjesinde Nurmaǵambetovke anyqtama qaǵaz beriledi. Onda 2017 jyly 30 shildede saǵat 23.00-de «Almaty-Ekaterınbýrg» avtojolynyń 409 shaqyrymynda kóliktiń órtenip ketkeni týraly anyqtama beriledi. Keıinnen sot oryndaýshysy M.Jákıev jasaǵan jalǵan kýáliktiń negizinde D.Nurmaǵambetovke qatysty múlikti tárkileý isin toqtatyp, kólikti memlekettik tirkeýden shyǵaryp tastaǵan.
Al shyndyǵynda ol mashına Nurmaǵambetovtiń astynda júrgen bolatyn, jáne ol kólikti 2,1 mln teńgege satyp jibergen.
Іsti qorytyndylaı kele jergilikti sot Jakıevti kináli dep taýyp, 4 jylǵa bas bostandyǵynan aıyrý týraly úkim shyǵardy. Alaıdy QR Táýelsizdiginiń 25 jyldyǵyna oraı jasalǵan raqymshylyqqa baılanysty onyń jyldary azaıtyldy.
Onyń múlki tárkilenip, qaýipsizdigi ortasha túzetý mekemesinde jazasyn 3 jyl óteıtin boldy.
