Qostanaıda jalǵan kásipkerlik derekteri kóbeıgen
QOSTANAI. QazAqparat - Qostanaı oblysy memlekettik kirister departamenti toǵyz aıda atqarylǵan jumystardyń qorytyndysyn jarııa etti, dep habarlaıdy QazAqparat tilshisi.
Departament málimetine sensek, oblysta jalǵan kásipkerlik derekteri kóbeıgen. Kóleńkeli bızneske qatysty birneshe fakti anyqtalyp, memlekettik baǵdarlamalarǵa bólingen qarajatqa qol suqqandardyń áreketi áshkere bolǵan.
Jalǵan kásipkerlikpen kúres jáne memlekettik baǵdarlamalar qarajatynyń ıgerilýin qadaǵalaý faktileri boıynsha 43 qylmystyq zańbuzýshylyq áshkerelendi. Onyń nátıjesinde 47 mln teńgege jýyq keltirilgen shyǵynnyń 34 mln teńgesi óteldi.
Bıyl departament qyzmetkerleri «Qazaqstan temir joly» kompanııasynan 40 tonna dızel otynyn urlap, ári qaraı satýmen aınalysqan qylmystyq topty quryqtady. Olar munaı ónimin oblys kásiporyndaryna, jergilikti turǵyndarǵa, tipti, Reseı Federatsııasynda saýdalaǵan.
Sondaı-aq, oblys ortalyǵynda zańsyz aınalymda bolǵan, lıtsenzııasy joq 36 tonna sharaptyń kózi joıyldy. Al Qarabalyq aýdanynda alkogoldi ónimdi zańsyz saqtap, satqan tulǵaǵa 500 aılyq eseptik kórsetkish kóleminde aıyppul salyndy.
