Qostanaıda jalǵan dollar taratqan qylmystyq top sottaldy
QOSTANAI. QazAqparat - Qostanaıda jalǵan dollar taratqan top sottaldy, dep habarlaıdy «QazAqparat» HAA tilshisi.
Jalǵan aqshalar shetelde ázirlengen jáne olardy túpnusqadan aıyrý óte qıyn bolǵan.
Qostanaı oblysy memlekettik kirister departamenti ekonomıkalyq tergeýler qyzmetiniń habarlaýynsha, qylmystyq top aıyrbas pýnktinde jalǵan AQSh dollarlaryn birneshe ret aıyrbastaǵan. Olardyń aty-jónderi anyqtalǵansha, nomınaly 100 AQSh dollary bolatyn 8 kýpıýrany aıyrbastap úlgergen.
Tergeýshiler jalǵan dollarlardyń shalǵaı sheteldiń tıpografııasynan joǵary sapada basylyp shyqqanyn anyqtady.
Sotta qylmystyq isti qaraý kezinde qylmyskerler óz aıyptaryn tolyq moıyndady. Olardyń ókinish bildirgenderi eskerile otyryp, sot aıypkerlerge 5 jylǵa deıin shartty túrde bas bostandyǵynan aıyrý jazasyn kesti.
