Qostanaıda jalǵan dollar ótkizýmen aınalysqan 5 adam sottaldy

QOSTANAI. QazAqparat - Qostanaıda 5 azamat jalǵan valıýta ótkizýmen aınalysqan, dep habarlaıdy QazAqparat Qarjy monıtorıngi agenttigine silteme jasap.

Sharapıev S. valıýta taýyp ákelýmen aınalyssa, Jakýpov T. jáne Shaımerdınov A. ony Qostanaı oblysynyń aýmaǵynda satqan, al erli-zaıypty Berdimuratovtar jalǵan aqshany Astana aýmaǵynda taratqan.

30 000 jalǵan dollardyń 28 600-i sotqa deıingi tergeý barysynda anyqtalyp, tárkilendi.

Sottalýshylarǵa «Jalǵan aqsha nemese baǵaly qaǵazdar jasaý, saqtaý, alyp ótý nemese ótkizý» babymen, sondaı-aq jábirlenýshilerdi aldaý faktileri bolǵandyqtan «Alaıaqtyq» baby boıynsha aıyp taǵyldy.

Sot úkimimen Sharapıev S. 5,5 jylǵa bas bostandyǵynan aıyryldy, ol jazasyn eń tómengi qaýipsizdik mekemesinde óteıdi.

Shaımerdınov A. men Jakýpov T. ortasha qaýipsiz mekemede 5,5 jyl otyrady, al Berdimuratovtar shartty túrde 5 jyl 2 aıǵa bas bostandyǵynan aıyryldy.

QMA memlekettiń qarjylyq qaýipsizdigine nuqsan keltiretin «kóleńkeli» ekonomıka salasyndaǵy qylmystar faktilerin ashýǵa baǵyttalǵan is-sharalardy jalǵastyrady.