Qostanaıda zeınetkerdi óltirip ketken kúdiktiler ustaldy
QOSTANAI. QazAqparat - Qostanaı oblysynyń polıtsııa qyzmetkerleri Meńdiqara aýdanynda zeınetkerge qaraqshylyq shabýyl jasaǵandardy ustady, dep habarlaıdy QazAqparat.
Meńdiqara aýdandyq polıtsııa bólimine er adamnyń zorlyq-zombylyqpen óltirilgeni týraly habarlama túsken.
«14 naýryzda 72 jastaǵy zeınetkerdiń páterine eki belgisiz azamat basa kóktep kirip, jábirlenýshige dene jaraqatyn salǵan, azyq-túlik, uıaly telefon jáne aqshasyn urlap ketken. Dene jaraqaty saldarynan zeınetker oqıǵa ornynda kóz jumdy», - delingen oblystyq Polıtsııa departamenti taratqan habarlamada.
Tergeý is-sharalaryn júrgizý barysynda polıtsııa qyzmetkerleri Qostanaı aýdanynyń aýmaǵynda jasyrynǵan eki kúdiktini ustady. Sot kúdiktilerdi kúzetpen ustaý túrindegi bultartpaý sharasyn sanktsııalady.
