Qostanaıda zeınetker araq suraǵan kúıeýin pyshaqtap tastady
QOSTANAI. QazAqparat - Qostanaıda zeınetker ishimdik surap mazasyn alǵan kúıeýin pyshaqtap tastady, dep habarlaıdy QazAqparat tilshisi oblystyq sottyń baspasóz qyzmetine silteme jasap.
Qostanaı oblysynyń qylmystyq ister jónindegi mamandandyrylǵan aýdanaralyq sotynyń qaraýyna QR QK 99-baby 1- tarmaǵy («Kisi óltirý») boıynsha aıyptalǵan 58 jastaǵy B-ǵa qatysty qylmystyq is tústi.
Іs materıaldaryna súıensek, osy jyldyń 24 tamyzynda keshke B. otbasymen birge úıinde araq ishedi. Erteńgi kúni úı otaǵasy áıeline ishimdik ishýdi jalǵastyrýdy suraıdy. Áıel as úıde júrgen kezde kúıeýi qasyna kelip, dúkennen qaryzǵa araq alyp kelýin aıtyp, mazasyn ala bastaǵan. Jubaıy ony pyshaqpen qorqytyp, barmaıtynyn aıtqan. Munyń arty janjalǵa ulasady. Urys-keris kezinde áıeli kúıeýiniń keýdesine pyshaq suǵyp alady. Alǵan jaraqattan er adam sol jerde kóz jumdy.
Іs boıynsha sot aldaǵy kúnderi ótedi.
