Qostanaıda zańsyz qoqys tókken júrgizýshiniń aıyppuly sot arqyly 34 esege ósti
ASTANA. KAZINFORM — Qostanaı oblysynyń prokýratýrasy zańsyz qoqys tastaǵan turǵynnyń aıyppulyn sot arqyly 34 ese ulǵaıtty.
2025 jyldan bastap «Taza Qazaqstan» tujyrymdamasyn iske asyrý aıasynda kólik quraldaryn paıdalanyp zańsyz qoqys úıindilerin uıymdastyrǵany úshin ákimshilik jaýapkershilik engizildi.
Qostanaı qalasynyń turǵyny júk kóligimen qurylys qaldyqtaryn qala shetindegi aýmaqqa aparyp, ruqsat etilmegen jerge tókken.
— Alǵashynda Qostanaı qalasy polıtsııa basqarmasy quqyqbuzýshyǵa eskertý jasaýmen shektelgen. Alaıda qoldanystaǵy zańnamaǵa sáıkes, qaldyqtardy basqarý salasyndaǵy ekologııalyq talaptardy buzǵany úshin 100 aılyq eseptik kórsetkishke deıin aıyppul qarastyrylǵan. Mamandandyrylǵan tabıǵat qorǵaý prokýrorynyń narazylyǵynan keıin sot 2026 jylǵy 28 mamyrdaǵy zańsyz qaýlynyń kúshin joıdy. Nátıjesinde quqyq buzýshyǵa 865 myń teńge kóleminde aıyppul salyndy. Sot sheshimi zańdy kúshine endi, — delingen habarlamada.
Tabıǵat qorǵaý prokýratýrasy osyndaı taǵy on zańbuzýshylyq faktisin anyqtady. Osyǵan baılanysty zań normalaryn birizdi qoldanýǵa arnalǵan is-qımyl algorıtmi ázirlenip, ýákiletti memlekettik organdardyń jumysy ońtaılandyryldy.
Qostanaı oblysynyń prokýratýrasy azamattar men zańdy tulǵalardy qoqysty tek arnaıy belgilengen oryndarǵa shyǵarýǵa jáne ekologııalyq zańnama talaptaryn saqtaýǵa shaqyrdy.
Budan buryn el boıynsha jyl basynan beri polıtsııa 177 myńnan astam ákimshilik quqyqbuzýshylyqty tirkep, 248 zańsyz qoqys úıindisin anyqtaǵanyn jazǵanbyz.
