Qostanaıda zań buzǵan 40 brakonerge aıyppul salyndy
QOSTANAI. QazAqparat - Ótken aptada Qostanaı oblysynda «Saıǵaq» jedel-iz kesý is-sharasy ótip, 40 brakonerge aıyppul salyndy, dep habarlaıdy QazAqparat oblystyq PD baspasóz qyzmetine silteme jasap.
14 qańtardan bastalǵan «Saıǵaq» operatsııasy kezinde 46 ákimshilik quqyqbuzýshylyq tirkeldi. Qostanaı oblysynyń jergilikti polıtsııa departamentiniń ekologııalyq polıtsııa basqarmasynyń bastyǵy Talǵat Ahmetovtyń aıtýynsha, 15-20 qańtar aralyǵynda quqyq qorǵaý organdarynyń qyzmetkerlerinen iriktelgen 40-tan astam mobıldi top quryldy.
«Barlyǵy 246 reıd ótkizildi. Quqyq qorǵaý organdarynyń qyzmetkerleri 28 ań aýlaý erejesiniń buzylýyn, 12 balyq aýlaý jáne 4 qarýdy tasymaldaý tártbin buzý áreketin anyqtady. Taǵy eki adam qarýdy zańsyz saqtaǵany úshin ákimshilik jaýapkershilikke tartyldy. Tártip saqshylary zań buzǵandarǵa 202 myń teńge ákimshilik aıyppul saldy», - dedi T. Ahmetov.
Bıyldan bastap zańsyz ań aýlaýshylarǵa salynatyn aıyppul kólemi artty. Máselen, brakoner sibir eligin atsa, 900 myń teńge tóleıdi. Ótken jyldyń ózinde tıisti qujattarsyz ań aýlaýǵa baılanysty 33 is tirkeldi. Brakonerler memleketke 350 mln teńge shyǵyn keltirgen.
«Ań aýlaýǵa qoıylatyn ózindik talaptar bar. Ańshy kýáligi, salyq zańnamasynda bekitilgen memlekettik baj salyǵynyń tólengeni týraly túbirtek, janýarlar dúnıesin paıdalanýǵa ruqsat, ańshylyq sharýashylyǵy sýbektisiniń joldamasy, ańshylyq atys qarýyn saqtaý jáne alyp júrý quqyǵyna bergen Іshki ister organdarynyń ruqsaty, jyrtqysh qustardy belgilengen tártippen berilgen tirkeý týraly qujat bolýy tıis. Zańsyz ań aýlaý boıynsha QR QK 337 jáne 339-baptarymen qylmystyq is qozǵalatynyn eskertemiz», - deıdi Qostanaı oblystyq orman sharýashylyǵy jáne janýarlar dúnıesi aýmaqtyq ınspektsııasynyń bas mamany Suńqarjan Baıdáýletov.
