Qostanaıda ystan ýlanǵan úsh bala aýrýhanaǵa jetkizildi
QOSTANAI. QazAqparat - Qostanaı qalalyq balalar aýrýhanasyna ystan ýlanǵan úsh bala jetkizildi, dep habarlaıdy «QazAqparat» HAA oblystyq TJD baspasóz qyzmetine silteme jasap.
Oqıǵa 15 qarasha kúni túste bolǵan.
«Jedel járdem qyzmeti qalalyq balalar aýrýhanasyna 10, 12 jáne 17 jastaǵy ıis tıip ýlanǵan úsh balany jetkizdi. Dárigerlerdiń aıtýynsha, balalarǵa «jeńil ýlaný» dıagnozy qoıylǵan», - dep habarlady vedomstvoda.
Aıta keteıik, aýrýhanada balalardyń jaǵdaıy qysqa ýaqytta turaqtandyrylyp, olar barlyq qajetti emderdi alyp jatyr. Dárigerler olardyń biraz ýaqytqa deıin pedıatrııalyq bólimde kúndizgi statsıonarda baqylaýda bolatynyn atap ótti.
Zardap shegýshilerdiń anasy túsindirgendeı, bul otbasy jeke sektorda turady. Balalar tańerteń bastary aýyryp turǵan, al úıde gazdyń ıisi shyǵyp turǵan. Balalardyń anasy jedel járdem shaqyrǵan.
«Qazirgi tańda qutqarýshylar oqıǵanyń mán-jaıyn anyqtap jatyr. Bir nusqa boıynsha, as úıde ornatylǵan ballonynyń eski redýktorynan gaz shyqqan», - dep túsindirdi qutqarýshylar.
