Qostanaıda vaktsınaǵa qarsy kórsetkishti anyqtama jasaǵandar áshkerelendi

NUR-SULTAN. QazAqparat – Qostanaılyq muǵalim vaktsınaǵa qarsy medtsıtsınalyq kórsetkishti qoldan jasaý qylmysynyń ashylýyna sebepker bolǵan, dep habarlaıdy QazAqparat.

Gıpertonııa jáne demikpe derti bar muǵalim óz tanysyna mektep basshylyǵy vaktsınalaý pasportyn talap etip jatqany týraly aıtady. Mundaı anyqtamany zańdy jolmen rásimdep, búkil tekserýlerden ótý úshin keminde 120 myń teńge kerek degen aqparat alǵan áıel atalǵan qyzmetti 20 myń teńgege «istep beretin» adamdarǵa júginedi.

Qujat jasaýshylar 20 myń teńge qoldaryna túsken boıda anyqtamany muǵalimniń úıine ákelip beredi. Alaıda áriptesi ol anyqtamanyń jaramdylyǵyna kúmán keltiredi. Ashýlanǵan áıel álgi qujatty berdi dep kórsetilgen memlekettik emhanaǵa baryp shý shyǵarǵan.

«Bas dárigerdiń medıtsınalyq qyzmetter sapasyn baqylaý jónindegi orynbasary oqıǵa týraly dereý polıtsııaǵa habarlady. Atalǵan fakti Qylmystyq kodekstiń «qujattardy qoldan jasaý» baby boıynsha sotqa deıingi tergeýdiń biryńǵaı tiziliminde tirkeldi. Onda 4 jylǵa deıin bas bostandyǵynan aıyrý túrindegi qylmystyq jaýapkershilik kózdelgen. Qazir tergeý júrip jatyr», - deıdi Іshki ister mınıstrliginiń baspasóz ókili Shuǵyla Turlybek.