Qostanaıda vagonnyń ústine shyǵyp sýretke túspek bolǵan jasóspirimdi toq soqty
ASTANA. KAZINFORM — Qostanaı oblysynyń kámeletke tolmaǵandardyń isteri jónindegi mamandandyrylǵan aýdanaralyq soty temirjolda toq soǵyp, aýyr kúıik alǵan jasóspirimniń qamqorshysyn ákimshilik jaýapkershilikke tartty.
Іs QR Ákimshilik quqyq buzýshylyq týraly kodeksiniń balany tárbıeleý jáne onyń qaýipsizdigin qamtamasyz etý mindetterin tıisinshe oryndamaýǵa qatysty baby boıynsha qaraldy.
Іs materıaldaryna sáıkes, 25 maýsym kúni keshki saǵat 21:00 shamasynda jasóspirim Qostanaı stantsııasyndaǵy Ońtústik temirjol parkiniń aýmaǵynda bolǵan. Sýretke túspek bolǵan ol baılanys jelisiniń astynda turǵan júk vagonynyń ústine shyǵyp, elektr toǵyna túsken.
Oqıǵa saldarynan jasóspirim aýyr jaraqat aldy. Onyń denesiniń 60 paıyzy kúıip, III dárejeli kúıik shogy, sondaı-aq murny men tili jaraqattanǵan.
Sot otyrysynda qamqorshy óz kinásin tolyq moıyndady. Onyń aıtýynsha, anasy qaıtys bolǵannan keıin jıenin ózi tárbıelep keledi.
Sot qaýlysymen er adam kináli dep tanylyp, oǵan 43 250 teńge kóleminde ákimshilik aıyppul salyndy.
Sot qaýlysy ázirge zańdy kúshine engen joq.
Aıta keteıik, Atyraýdaǵy ortalyq kópirde toq soqqan azamattar kinálilerdiń zań aldynda jaýap bergenin qalaıdy.
