Qostanaıda vagondaǵy taýardy urlaǵan temirjolshylar ustaldy

QOSTANAI. QazAqparat – Kóliktegi polıtsııa departamenti qyzmetkerleri júk vagonynan quny 600 myń teńgege jýyq taýardy urlaǵan temirjol jumysshylaryn ustady, dep habarlaıdy QazAqparat.

Departamenttiń baspasóz qyzmeti taratqan aqparatqa sáıkes, Qostanaı stansasyndaǵy jelilik polıtsııa bólimine jergilikti jaýapkershiligi shekteýli seriktesterdiń biriniń ókili shaǵymdanyp kelgen. Onyń aıtýynsha, «Qytaı halyq respýblıkasy - Qostanaı» baǵytynda kele jatqan júk poıyzy vagondarynyń birinen badam jańǵaǵyn (mındal) salynǵan 75 qorapty belgisiz bireýler urlap ketken.

«Kólik polıtseıleri jedel-izdestirý is-sharalaryn júrgizý barysynda bes er adamdy ustady. Tekserý barysynda olardyń Qaraǵandy oblysynan ekeni anyqtalǵan. Olardyń bári temirjol uıymynyń qyzmetkerleri bolyp shyqty. Ksápkerge 590 759 teńge shyǵyn kelgen. Jaýap alý kezinde kúdiktiler kinálaryn moıyndady», - delingen departamenttiń aqparatynda.

Qazirgi ýaqytta aıǵaq zattary kompanııaǵa qaıtaryldy. Qazir tergeý amaldary júrgizilýde.