Qostanaıda uzyndyǵy 17 metrlik jerústi ótkeli salynady
QOSTANAI. QazAqparat - Qostanaı oblysynyń ortalyǵyndaǵy Gashek kóshesinde jerústi ótkeliniń qurylysy bastaldy. Bul týraly qalalyq turǵyn úı-kommýnaldyq sharýashylyǵy bóliminde málim etildi, dep habarlaıdy QazAqparat tilshisi
Jerústi ótkeliniń qurylysyna 37 mıllıon teńge jumsalmaq. Qazirgi kezde qurylysshylar ótkel salynatyn jerdiń óńdeý jumystarymen aınalysýda.
«Ótkel birneshe sporttyq nysan men avtoturaqty jalǵaıdy. Uzyndyǵy - 17 metr, eni 2 metrdi quraıdy. Baǵannyń bıiktigi - 4,5 metr. Ótkelge saty arqyly jáne elektrkótergishpen shyǵýǵa bolady. Pandýs ornatý da josparda tur. Negizgi qurylys qospaly bolattan jasalady, al shatyrǵa polıkarbonat qoldanylady», - dedi qalalyq TKSh bóliminiń basshysy Alekseı Tarasov.
Onyń aıtýynsha, jerústi ótkeli qarasha aıynda-aq paıdalanýǵa beriledi. Dál osyndaı nysan kelesi jyly Gagarın kóshesinde boı kóteredi dep josparlanýda.
