Qostanaıda úıi sýǵa ketken turǵyndar kómekti úsh saǵat kútken

PETROPAVL. KAZINFORM — Qostanaıda erigen qar sýy jeke sektordaǵy turǵyn úılerge kire bastady.

Qostanaı qalasynyń turǵyny Venera Baıǵuttınanyń qyzy Narımanovka shaǵyn aýdanynda turady. Búgin saǵat 14:00 kezinde anasyna habarlasyp, úıiniń sýǵa ketip jatqanyn aıtqan. Qustaı ushqan ata-ana jolaı arnaıy qyzmetterge de habarlasyp, kómek suraıdy. Saryla kútken kómek tek bir saǵattan keıin ǵana jetken.

— Tótenshe jaǵdaılar departamentiniń traktory keldi sý sorýǵa, biraq shlangasy joq. Alyp kelýge ketip, sony biraz kúttik. Ákimdikten de birneshe adam kelgenimen, olardan qaıran bolmady. Qoldaryn qaltalaryna salyp júr, — deıdi Venera Baıǵuttına.

Dachnaıa, 30 mekenjaıynda ornalasqan bul úsh bólmeli úıde bes adam turyp jatyr. Erli-zaıypty Sheferdiń úsh balasy bar. Úlkeni onda bolsa, kenjesi eki jyl buryn dúnıege kelgen. 

— Qyzym dekrettik demalysta otyr. Kúıeý balam jumys isteıdi. Estı sala jettik. Sý shamamen 30 sm deıin kóterildi. Shelektep tasyp, tóktik. Byltyr da úıleri sýǵa ketken edi. Biraq úılerińniń sýǵa ketkenine dálel joq dep, vıdeonyń bolǵanyna qaramastan ótemaqy tólemedi. Úı saıda tur. Sý almaýy úshin sýaǵardy tazalap, ashý kerek eken. Al ol jumys bıyl da atqarylmaǵan. Endi búkil kilemi, eden tósemesi qalqyp júr. Turmystyq tehnıkanyń bári isten shyqty, — deıdi Venera Baıǵuttına.

Turǵynnyń aıtýynsha, kútken kómek tek úsh saǵattan keıin ǵana iske kirisip, úıdegi sýdy soryp alǵan. 

Buǵan deıin SQO-da kún kúrt jylynyp, kóshelerden qar eki aýysymmen shyǵarylyp jatqanyn jazǵan edik.