Qostanaıda úı kútýshisi páterden 4,5 mln teńge urlap ketken

QOSTANAI.QazAqparat – Qostanaı qalasynda úı qyzmetkeri páter ıesiniń qomaqty qarjysyn urlap ketken, dep habarlaıdy QazAqparat tilshisi oblystyq Polıtsııa departamenti baspasóz qyzmetine silteme.

Qostanaı qalasy polıtsııa basqarmasynyń Ońtústik polıtsııa bólimine 63 jastaǵy qala turǵyny júginedi. Ol páterinen 7200 dollar jáne 2800 eýro urlanǵanyn habarlaǵan.

«Ótinish berýshiniń kúdigi Elena esimdi úı kútýshisine túsken. Jábirlenýshiniń aıtýynsha, osy jyldyń kúzinen bastap ol aıyna bir-eki ret páterdi tazalaý úshin keletin beıtanys áıeldi jaldaǵan. Jedel izdestirý is-sharalary barysynda polıtsııa bóliminiń qyzmetkerleri Qostanaı qalasynyń buryn sottalmaǵan 47 jastaǵy turǵynyn anyqtap, ustady. Aqshalaı qarajattyń bir bóligi ıesine qaıtaryldy. Kúdikti aqshanyń bir bóligin jumsap, týystarynyń nesıesin tólep, bir bóligin bankke depozıtke salyp úlgergen», - deıdi oblystyq polıtsııa departamenti baspasóz qyzmetiniń mamany Kenje Qonysbaı.

Qazir atalǵan fakti boıynsha qylmystyq kodekstiń 188-baby 3-bóligimen sotqa deıingi tergeý amaldary júrgizilýde.