Qostanaıda úsh jerge bomba qoıylǵanyn habarlaǵan kúdiktige izdeý salyndy

QOSTANAI.QazAqparat – Qostanaı oblysynda birneshe jerge bomba qoıylǵanyn habarlap, jalǵan aqparat taratqan «telefon terrorısi» izdestirilip jatyr, dep habarlaıdy QazAqparat oblystyq polıtsııa departamentiniń baspasóz qyzmetine silteme jasap.

Buǵan deıin Qostanaı oblysynyń polıtseıleri jarylǵysh zat týraly jalǵan habarlama taratqan kúdiktige izdeý salǵan.

Tártip saqshylary dereý oblys ortalyǵyndaǵy eń iri «Mart», «Qostanaı Plaza» saýda ortalyqtarynda júrgen 2300-den astam adamdy evakýatsııalady. Oqıǵa ornyna polıtsııa kúshterinen bólek, jedel medıtsınalyq járdem, ózge de tótenshe qyzmetter jetken. Biraq saýda ortalyqtarynyń eshqaısynan «bomba» tabylmady.

Bir kún ótken soń polıtsııaǵa qurylys dúkenine bomba qoıylǵany habarlandy.

Saldarynan qurylys materıaldaryn satatyn iri saýda ortalyǵynan 87 adamdy qaýipsiz aımaqqa kóshirýge týra keldi. Bul joly da saýda ǵımaratynan eshqandaı jarylǵysh zat tabylmady.

Jalǵan aqparat taratýdyń úshinshi jaǵdaıy keshe tirkeldi. Polıtsııa departamentine avtovokzal aýmaǵyna jarylǵysh zattyń qoıylǵany aıtyldy.

«Arnaıy mamandar ǵımaratty túgel tekserip shyqty. Eshqandaı jarylǵysh zat tabylǵan joq. Avtovokzaldan 40 adam evakýatsııalandy. Qazir osy oqıǵaǵa qatysty tekserý-izdestirý sharalary júrip jatyr. Polıtsııa men turǵyndardy birneshe kún dúrliktirip qoıǵan jalǵan aqparatty bir adam taratyp otyrýy múmkin. Kúdikti joǵary tehnologııalyq qurylǵylardy paıdalanǵan. Іzdeý sharalaryna tájirıbeli mamandar jumyldyryldy», – dedi oblystyq polıtsııa departamenti ekstremızmge qarsy is-qımyl basqarmasy bastyǵynyń orynbasary Erlan Sembın.