Qostanaıda úsh balasyn tastap ketken áıel jazadan qutyldy
QOSTANAI. QazAqparat - Qarabalyq aýdanynda úsh balasyn tastap, ishimdikke salynyp ketken áıel jazadan bosatyldy, dep habarlaıdy «QazAqparat» HAA tilshisi.
Bul týraly áleýmettik jelilerde «Úmit pen meıirim ushqyny» qoǵamdyq qorynyń jetekshisi Marııa Saparova jazdy.
Belgili bolǵandaı, Nadejda Vorjevaıa ústimizdegi jyldyń qazan aıynda aýdan ortalyǵyndaǵy úıinen shyǵyp ketken. Balalardyń jylaǵan daýsyn estigen kórshileri páterge kiredi. Úsh balanyń jalǵyz otyrǵanyn kórgen olar birden ıývenaldyq polıtsııaǵa habar berdi. Qyzýy kóterilip, aýyryp jatqan bes aılyq nárestesi aýdandyq ortalyq aýrýhanaǵa jetkizildi. Al bezbúırek ana balalaryn izdep, aýrýhanaǵa birneshe kúnnen soń bir-aq kelgen. Qarabalyq turǵyndarynyń aıtýynsha, úıdiń otaǵasy bala-shaǵasyn tastap, basqa oblysqa kóship ketken. Áıeldiń ishimdikke salynýyna osy jaǵdaı sebep bolýy múmkin.
Kámeletke tolmaǵandardyń quqyqtaryn qorǵaý jónindegi komıssııa 24 jastaǵy Vorjevaıa bul qylyǵy arqyly óz balalarynyń densaýlyǵyna qaýip tóndirdi dep sheshti. Oǵan balǵyndarymen 6 aı boıy kórisýge tyıym salyndy. Osy ýaqyt aralyǵynda balalar Qostanaıdaǵy «Delfın» sábıler úıinde boldy.
Jaqynda memlekettik organdar men uıymdardyń kámeletke tolmaǵandarǵa qatysty qorǵanshylyq jáne qamqorshylyq jónindegi qyzmetiniń ótinishimen Nadejda Vorjevaıa balalaryn kórýge ruqsat aldy. Atalǵan mekemeniń ótinish jazýyna Vorjevaıanyń turaqty jumysqa turǵany sebep bolypty. Al páterdiń kommýnaldyq bereshekterin óteýge «Úmit pen meıirim ushqyny» qoǵamdyq qory kómektesken. Vedomstvo mamany Qaırat Edilbaevtyń aıtýynsha, bul - Nadejda Vorjevaıaǵa berilgen sońǵy múmkindik.
«Eger osyǵan uqsas jaǵdaı qaıtalanatyn bolsa, is sotqa jiberiledi. Al áıel analyq quqyǵynan aıyrylýy múmkin», - deıdi maman.
