Qostanaıda un zaýyty ashylady
QOSTANAI. QazAqparat - Qostanaıda bıdaı jáne maıly daqyl ónimderin qatar óńdeıtin jańa un zaýyty salynady, dep habarlaıdy QazAqparat.
Oblys ákimi Arhımed Muhambetovtiń qatysýymen ótken selektor keńesinde óńirdegi ınvestıtsııalyq jobalardyń júzege asý barysy talqylandy. Bıyl qurylysy bastalatyn nysannyń biri - un zaýyty. Atalǵan jobany almatylyq «Bio Grain» kompanııasy qolǵa almaq. Kóp salaly ári óndiristik qýaty asa joǵary jańa kásiporyn un, kespe, krahmal, glıýten, qospajem jáne maıly daqyl ónimderin óńdep shyǵaratyn bolady.
«Un zaýytyn salý úshin barlyǵy 90 mlrd teńge qajet. Zaýyt iske qosylsa, 500 jańa jumys orny ashylady. Onyń 20-sy - qytaılyq ınjener-tehnolog mamandar. 480-i - jergilikti turǵyndar. Biliktiligin arttyrý maqsatynda 100 adam Qytaıǵa oqýǵa jiberiledi dep josparlanǵan. Zaýytty qajetti shıkizatpen jergilikti sharýashylyqtar qamtamasyz etedi. Kásiporyn dıhandardan jylyna 600 myń tonna 3 klasty bıdaı, 120 myń tonna maıly daqyl jáne 750 myń tonna 4,5 klasty bıdaı satyp alýdy josparlap qoıǵan», - dedi «Bio Grain» kompanııasynyń basshysy Dına Ótebaeva.
Un zaýyty qurylysqa ruqsat berilgennen keıin 2 jarym jyl ishinde salynyp bitedi. Qurylys jumystaryna 1200 adam tartylmaq. Qazir oblys ortalyǵyndaǵy ındýstrııalyq aımaqtan jobaǵa laıyq jer telimin resimdeý júrip jatyr.
Jıynda Arqalyq qalasyndaǵy et óńdeý kesheniniń qurylysy da sóz boldy. Kásiporyn keleshekte jylyna 1000 tonnaǵa deıin et óńdep, shujyq ónimderi men et konservilerin shyǵarady. Búginde keshenniń mal soıý, et óńdeý tsehtarynyń, qoıma ǵımarattarynyń ishi árlenip, qurylǵylardy qurastyrý, ornalastyrý jumystary júrip jatyr. Mal soıatyn orynǵa elektr jelileri men sý, jylý qubyry tartylǵan. Atalǵan qurylys jumystaryna 60 adam tartylǵan. Keshenniń et óńdeıtin qurylǵysy Polshadan satylyp alyndy. Quny 250 mln teńge bolatyn qurylǵy Arqalyqqa 15 tamyz kúni jetkiziledi. Údemeli ındýstrııaly-ınnovatsııalyq baǵdarlama aıasynda qolǵa alynǵan aýqymdy joba bıyl qazan aıynda iske qosylmaq.
Atalǵan ınvestıtsııalyq joba, basqasyn aıtpaǵanda, turmysy tórt túlik malǵa qarap otyrǵan Torǵaı óńiri turǵyndarynyń áleýmettik jaǵdaıyn jaqsartady degen úmit mol. Arqalyq et óńdeý zaýyty buǵan deıin baqqanyn baqyrǵa aıyrbastap kelgen baıtaq jurttyń tirshiligin berekeli etpek.
Aıta keteıik, bıyldyń ózinde oblysta jalpy quny 37 mlrd teńge bolatyn 18 joba júzege asyp, 1000 adam turaqty jumys ornymen qamtylǵan. Aldaǵy jyly jańadan 10 ınvestıtsııalyq joba iske qosylmaq.
