Qostanaıda Ulyqbek Esdáýlettiń jyr keshi ótti
Jyr keshin belgili aqyn Aqylbek Shaıahmet júrgizip otyrdy. Ol jaqynda Ulyqbek Esdáýlettiń dramatýrgııadaǵy alǵashqy týyndysy «Zere» pesasynyń jurtshylyqqa usynylǵanyna toqtaldy. Avtordyń aıtýynsha, shyǵarmada Zereni tek ana retinde ǵana emes, qaıratker retinde kórsetýge tyrysqan.
Munan soń Ulyqbek aqyn ortaǵa shyqty. Ol Tobyl-Torǵaı topyraǵynda týyp-ósken aqyn-jazýshylardyń qazaq qoǵamyna sińirgen eńbekterin atap ótti.
«Jalpy, qasıet tunǵan ólke dep kez kelgen jerge aıtyla bermeıdi. Myna Torǵaı dalasyna qarap turyp-aq, álgi sóz birden oıǵa oralady. Sebebi, bul óńirdiń qazaq rýhanııatyna syılaǵan arda tulǵalary jeterlik. Negizi, osy óńirge 1982 jyly Ǵafý Qaıyrbekov ertip kelip edi. Sodan keıin arnaıy bet burǵanym osy. Onyń aldynda Torǵaı jerinde kombaınshy bolǵanmyn. Menimen Qonysbaı Ábil de astyq jınaýǵa qatysty», - dep eske alady aqyn.
Ulyqbek Esdáýlet jalyndy jyrlaryn oqyp, jurtshylyqtyń ystyq yqylasyna bólendi. Stýdentter onyń óleńderin jatqa aıtty. Sondaı-aq, osy basqosýda qoǵam qaıratkeri Murat Áýezov, jazýshylar odaǵynyń oblystyq fılıaly dırektory Ǵumar Ahmetchın men oblystyq «Qostanaı tańy» gazetiniń bas redaktory Januzaq Aıazbekov qalamger jaıly lebizderin bildirdi.
«Qazaqta ataǵy erte shyqqan aqyndar az bolsa, sol kóshtiń basynda Ulyqbek Esdáýlet tur. Onyń bir ǵana «Zaman-aı» óleńi nege turady? Bul jyry kele-kele «Nevada-Semeı» qozǵalysynyń ánuranyna aınaldy. Árıne, bir óleńmen-aq aqynnyń poezııadaǵy shynaıy beınesin ashý múmkin emes. Ol talaı oqyrmannyń súıikti aqynyna aınaldy. Onyń ishinde men de bar bolǵanyma qýanamyn», - dedi Murat Muhtaruly.
Ýnıversıtettegi ótken keshti halyq aqyny Ásııa Berkenova basqaratyn «Óner» stýdııasynyń jastary ánmen árledi.
