Qostanaıda ulttyq-mádenı ortalyq salynady

QOSTANAI. QazAqparat - 2019 jyly Qostanaı qalasynda memlekettik-jekemenshik áriptestik aıasynda ulttyq-mádenı ortalyq boı kóteredi, dep habarlaıdy QazAqparat tilshisi.

Qostanaı oblysynyń ákimi Arhımed Muhambetov turǵyndarǵa esep berý kezdesýinde atap ótkendeı, byltyrǵy jyl qostanaılyqtar úshin rýhanı jańalyqtarǵa toly boldy. Óńirde «Rýhanı jańǵyrý» baǵdarlamasyn iske asyrý aıasynda eskertkishter men keseneler salynyp, mádenı baǵdarlamalar uıymdastyryldy. Atap aıtqanda, Keıki batyrdyń súıegin jerleý, Shaqshaq Jánibekke eskertkish ashý, Ybyraı Altynsarınniń kesenesin qaıta jańǵyrtý - atalǵan sharalardyń basy boldy.

«Birneshe jyl boıy jemisin berip kele jatqan «Kórkeıe ber, Qostanaı!» aktsııasy byltyr da jaqsy jańalyqtarymen qýantty. Oblystyń kıeli jerleri boıynsha ekspedıtsııa uıymdastyrylǵan «Uly dala qazynasy» jobasy qoǵamdyq rezonansqa ıe boldy. Qalalar men aýdandarda áleýmettik ınfraqurylym jaqsartyldy: balalar jáne sport alańdary, shaǵyn ortalyqtar, mádenıet úıleri ashylyp, 100-den astam bilim berý, densaýlyq saqtaý, mádenıet jáne sport mekemeleri jóndeýden ótti», - dedi Arhımed Muhambetov.

Oblys ákimi tilge tıek etken taǵy bir joba - qaladaǵy ulttyq-mádenı ortalyq. Atalǵan ortalyq 1000 adamǵa shaqtalǵan. Qurylys jumystaryna 1 mlrd 700 mln teńge jumsalmaq.

«Ulttyq-mádenı ortalyq oblystaǵy eń kólemdi nysandardyń biri bolady. Munda túrli deńgeıde sharalar ótedi. Negizinen, qurylysshylar aldaǵy jeltoqsan aıynda barlyq jumystardy tolyqtaı aıaqtaýǵa ýáde etip otyr. Degenmen, ortalyq 2019 jyldyń birinshi toqsanynda el ıgiligine beriledi. Aıta keteıik, ulttyq-mádenı ortalyqtyń salynýyna ınvestorlardyń qarajaty tartyldy. Bul rette bıýdjetten aqsha bólinbeıdi», - dedi oblys basshysy.