Qostanaıda Ulttyq dombyra kúnine arnalǵan aktsııa ótti
QOSTANAI. QazAqparat - Qostanaıda Ulttyq dombyra kúninde «Babalardyń kózindeı qasıetti dombyra» atty aktsııa uıymdastyryldy. Shara barysynda oblystyq Qazaqstan halqy Assambleıasy ujymy jańa týǵan sábılerge dombyra syılady dep habarlaıdy QazAqparat.
Ulttyq dombyra kúni oblystyq Qazaqstan halqy Assambleıasy qalalyq perzenthanaǵa keldi. Mundaǵy maqsat - jańa týǵan sábılerge dombyra syılaý. Sondaı qýanyshqa kenelgen sábılerdiń biriniń esimi - Sezim. Onyń anasy, Áýlıekól aýdanynyń turǵyny Anastasııa Birjanovanyń aıtýynsha, bul kútpegen syılyq boldy.
«Sezim bizdiń úshinshi balamyz. Sábıimizdiń esimin yrymdap qoıdyq. Sebebi, úshinshimiz óziniń tátti qylyqtarymen qýantsyn dedik. Árıne, qasıetti dombyra merekesi kúni týǵanyna qýanyshtymyz. Onyń aǵasy Ermurat pen ápkesi Kámıla mýzykaǵa qyzyqpaýshy edi. Endi kenjemiz bul olqylyqtyń ornyn toltyryp, Dına ájesindeı ataqty kúıshi bolady dep senemiz. Dombyra - Sezimniń eń birinshi úlken syılyǵy», - dedi A. Birjanova.
Dombyra aspabyn sábılerge oblystyq QHA tóraǵasynyń orynbasary Bıbigúl Aqqojına tapsyrdy.
«Búgin bizdiń perzenthanaǵa kelip, sábılerge dombyra syılaýymyzdyń ózindik máni bar. Sebebi, ulttyq rýhty jas óskinge besik jasynan bastap sińirý qajet. Muny Elbasymyz da aıtty. Dombyranyń qazaq halqynyń ómirindegi róli týraly barlyǵymyz bilemiz. Sol sebepti, búgingi syılyq ıeleri de tárbıeli, eldiń patrıoty boldy dep oılaımyz», - dedi Bıbigúl Aqqojına.
Perzenthanadaǵy Ulttyq dombyra kúni munymen aıaqtalǵan joq. Perzenthanadan búgin shyqqan jas analar «Táýelsizdikke 25 jyl» saıabaǵynda ótetin merekelik sharaǵa atsalyspaq.
