Qostanaıda Ulttyq ulan sý tasqynyna qarsy aldyn alý sharalaryna jumyldyryldy
ASTANA. KAZINFORM — Qostanaıda ornalasqan 6697 áskerı bóliminiń 70-ke jýyq áskerı qyzmetshisi jergilikti atqarýshy organdar men qutqarý bólimshelerine kómek kórsetý úshin Arqalyqqa jiberildi, dep habarlaıdy Ulttyq ulannyń baspasóz qyzmeti.
Qostanaı oblysy Arqalyq qalasynda Qazaqstan Respýblıkasy ІІM Ulttyq ulanynyń áskerı qyzmetshileri qutqarýshylarmen jáne azamattyq qorǵaý organdarynyń mamandarymen birlesip sý tasqynyna qarsy profılaktıkalyq is-sharalardy júrgizýge jumyldyryldy. Atalǵan shara maýsymdyq jylyný jáne qardyń erýi kezinde sý basýdyń aldyn alý maqsatynda uıymdastyrylǵan.
— Qostanaıda ornalasqan 6697 áskerı bóliminiń 70-ke jýyq áskerı qyzmetshisi jergilikti atqarýshy organdar men qutqarý bólimshelerine kómek kórsetý úshin Arqalyqqa jiberildi. Alǵashqy kúnderden bastap ulandyqtar júktelgen mindetterdi oryndaýǵa qarqyndy qatysty. Qazirgi ýaqytta jeke quram aldyn alý sharalary keshenin júzege asyrýda. Áskerı qyzmetshiler erigen sý jınalýy yqtımal ýchaskelerge monıtorıng júrgizedi, táýlik boıy kezekshilik atqarady, bul jaǵdaıdyń ózgerýine ýaqtyly den qoıýǵa múmkindik beredi, — delingen habarlamada.
Halyqqa, eń aldymen tyl ardagerlerine kómek kórsetýge erekshe kóńil bólinedi. «Novyı» aýdanynda ulandyqtar úı mańyndaǵy aýmaqtardy qardan tazartyp jatyr. Búgingi tańda 200-den astam aýla tazartyldy, jumystar kúsheıtilgen rejımde jalǵasyp keledi.
Aıta ketý kerek, ulandyqtardyń qutqarýshylarmen jáne jergilikti atqarýshy organdardyń ókilderimen jedel jáne úılestirilgen is-qımyldary turǵyndardyń qaýipsizdigin qamtamasyz etýde jáne óńirdegi turaqty jaǵdaıdy saqtaýda mańyzdy ról atqarady.
Budan buryn Aqmola jáne SQO qutqarýshylary sý tasqyny jaǵdaıyn baǵalaǵanyn jazǵanbyz.
